يوم يذكرنا بماضي الأعوامي

يوم الوطن نافل على كل الأيام
يومن يذكرنا بماضي الاعوامي
وكفاح شيخ بالملازيم مقدام
أفعال أبوتركي عريب العمامي
أمجاد اخو نوره ذخر كل منظام
الفيصلي صيروم نجد الامامي
لم الجزيرة من يمنها إلى الشام
والنور طلعاته يزيل الظلامي
مرحوم ياللي يسري الليل ما نام
سبعن شجاعن ما يهاب الهوامي
من دار أبوجابر مشى الشيخ قدام
ويقول شوفت نجد غاية مرامي
ودوم يتخيلها بلذات الاحلام
وادا تذكرها يعاف الطعامي
وجاها بعد ما غاب عنها اثنعش عام
يطوي الفيافي والجبال الزوامي
وجمع اشعوبن كانت اشتات واقسام
ستين عاماً ما اهتنى بالمنامي
وصارت بخير وعز وافراح وانعام
واللي زين دار الفخر ما يظامي
في كلمة التوحيد والخير واحسام
رفرف علمهم والسعد دوم قامي
ثم انتقل لجوار باري وعلام
عساه بالجنه رفيع المقامي
وبعذه عياله كل فارس وضرغام
سعود والفيصل وخالد كرامي
نم الزعيم اللي تصدى لصدام
رد الجميل وجارته ما تظامي
الامجد الافخم عن الحق ما نام
هذاك ابوفيصل شبيه القطامي
واليوم في حكم البطل رافع الهام
في الحكم ابومتعب لبسنا الوسامي
وولي عهده للمعادين لطام
سلطان ابوخالد عداه الملامي
والاسرة اللي عزهم عز الإسلام
الكل منهم له يزيد احترامي
حميد بن خلف العوادي