ميدان أبو تركي بالأمجاد مزحوم

عظيمة هي المناسبة، وتحمل اسم رجل عظيم غير مجرى التاريخ ببطولاته وإنجازاته التي وحدت هذا الكيان الشامخ، وأسبغ الله علينا بفضله ثم بجهود المؤسس - رحمه الله - أنعاماً كثيرة، حيث تقام هذه الأيام مسابقة الملك عبدالعزيز بن عبدالرحمن ال سعود - طيب الله ثراه - لمزايين الابل بأم رقيبة، تحت رعاية كريمة ودعم كبير للإبل وملاكها من لدن صاحب السمو الملكي الأمير مشعل بن عبدالعزيز - أطال الله في عمره على طاعته - وان كانت حقيقة ليست مسابقة للإبل فقط بل هي مهرجان فكر وشعر وموروث أصيل.
وبهذه المناسبة أتت هذه القصيدة:
من يوم ما عشت الحدث صرت ملزوم
اقصد عسى تسعفني الابجدية
يا هاجسي قدام لا يلحقك لوم
حث الخطى واستنجد الشاعرية
ميدان أبو تركي بالامجاد مزحوم
اذكر لنا من منجزاته شويه
اللي له التاريخ ما يجلس يقوم
ياقف على طاريه ويقول حيه
عبدالعزيز امحير الفرس والروم
قصة كفاحه معجزة فيصليه
جا والزمن صاخب ومايج ومحموم
والناس فيهم تنهش الجاهلية
جاهم وساوى بين ظالم ومظلوم
في ظل شرع الله وسنة نبيه
من سالفة شلفاه والأمر محسوم
ما عاد يوجد بينهم عنجهية
عقب الشتات وعقب ماكانوا اقسوم
صار التلاحم في السعودي مزية
جعلك يابو تركي عن النار معصوم
وعسى عيالك للجنان الندية
في عهد عبدالله حجى كل مظيوم
انباج صبح التنمية للرعية
قدنا يابو متعب وعانق بنا انجوم
يا نبض الأمة في الظروف العصية
واجه تحدي وقتنا وانت زيزوم
لك في جبين المجد بصمة جلية
شعبك يحبك حب داوود للصوم
بينك وبين أهل الوطن جاذبية
والشعب عنه انزاحت أحزان وهموم
مع عودة شيوخ الفخر والحمية
محبوبنا مشعل عسى عزه يدوم
وسنين أبو خالد عساها مدية
على سلامتهم نحرنا من الكوم
والليل كله عرضة وسامرية
الفرحة انست شعب أبو متعب النوم
واستبشرت مكة ونجد العذية
واصبح سما عرعر من الفرحة غيوم
واستمطر الدمام وأبها البهية
وأنا أشهد ان اللي على الجبهة قروم
ياحظكم بالبدلة العسكرية
من عاش منكم عاش في عز معلوم
ومن مات منكم مات ميته هنية
اقلوبنا من فوقكم تدرج الحوم
تدعي لكم بالنصر صبح وعشية
والشعب كله عسكر بدون مرسوم
في الحرب كل(ن) ينقل البندقية
لجل الوطن وقيادته ننحر القوم
ونواجه المليون بالخمس مية
واللي يخون العهد بالعار موصوم
ما يستحق انه يشيل الهوية
والبل لها عند العرب قدر مفهوم
قدر(ن) مثل قدر الخوي مع خويه
في خلقها تصوير وابداع قيوم
مذكور في تنزيل رب البرية
وفي درها مطعوم عن كل مطعوم
فيه الشفا للناس والقابلية
من هو نبت عظمه على الدر يا قوم
ما راح للدكتور والصيدلية
سفن القفار اللي تهوم الوطا هوم
أسعارها مهما علت واقعية
البل لو انك من غثا الوقت مهموم
ممشاك فيها يرفع المعنوية
والبل غناة وربحها مغري اليوم
والشاهد اتجيب (العمارة) (لقية)
راجح بن نايف المغيري