الحروف الحزينة

جاني خبر مكتوب بدموع وجروح
كل الحروف اللي بوسطه حزينه
طاحت عليه دموع عيني وانا انوح
وقلبي من الفرقى تزايد حنينه
قمت اتوجد كاتم الشوق ما ابوح
واصبّر قليبي عسا الله يعينه
واعشمه هم الليالي يبي يروح
اصبر ياقلبي والجروح الدفينه
وازريت انا انسى همي منين ماروح
كل اتجاهاتي جروحا ً طعينه
والعين مهما تخفي الدمع مفضوح
ما تحتمل دمع الالم والغبينه
ياللي تقول الدمع مافيه مصلوح
علمني بطب الجروح اللعينه
وين الطبيب اللي يداوي يا ممدوح
وين الصبر واشريه يا سعود وينه
ماظنتي بالطب حزني يبي يروح
وقلبي غدى يا عناد مثل الرهينه
لاصار فرقى من توده من الروح
سلم على قلبك ترى حان حينه
ودام الشقا يا حمود مكتوب باللوح
كلا ً يذوق اللي انكتب في جبينه
عبدالرحمن الذايدي