يالله تغيث الأرض

بسم الذي ينشي سحاب مزابير
مزناً يصفصف شامخ(ن) تقل ضلعان
مزنا مكشخم دوب ممشاه بالسير
والله أمر يمطر على الأرض هتان
سحباً من المنشأ مطرهن شخاتير
هلهل بردها وأمطرت غر الأمزان
وسيله تحدر من فروعه محادير
متحدراً يلطم من فروع وديان
القاع جرفها وسوّى معابير
سيل زما مشا الشغايا وشعبان
ويازين لاصاب السحاب المبادير
وعساه ضافي شامل كل الأوطان
من الحديثة مستهلاً إلى صوير
ومن غربي الشامة ياعله لحلوان
ومن حقل قولوا ياعساها لخرخير
ومن طريف تمطر مستهلة لنجران
ويالله تفرجها تزيل العواثير
يالله تغيث الأرض ياعالي الشان
ضاقت على عبادك جميع التباصير
يالله تغيث الكون للغيث شفقان
وعقب المحل تصبح فياضه مخاضير
ويطلع بها من كل مختلف الألوان
يسلى بها الناظر بشوف النواوير
متخالطن عشب البختري لقحوان
وتفهقت بالعشب صفر ومغاتير
بأرض قفر ماطبها راعي الضان
والجو زان وصار بالجو تغيير
وتباشروا بالخير حضرن وبدوان
وصلوا دواوير الكما تالي عصير
ولقوا طلبهم بالمحاير وسيحان
فضل من اللي دبر الكون تدبير
فضل من اللي فارض(ن) خمس الاركان
محمد بن عايد الشراري