يالله نسألك غيث جم صافي شراب

الأرض جدباء كثير غبارها والسراب
والماء عروقه شحيحه مورده ما يسر
واهل الدبش والمزارع كل يوم حساب
تطرح وتجمع وتضرب كم قرش اتخسر
يامن تجيب الدعاء يالله دعوى تجاب
دعوى عباد ترجى رحمتك والظفر
يالله يالله يا منشي ثقيل السحاب
بمرك تسوق السحب بمرك تهل المطر
يالله نسألك غيث جم صافي شراب
وافي وشامل على كل القرى والدير
يالله خيراً بلا هدم ولابه عذاب
سقيا تفيد الخلايق بدوها والحضر
وتسيل وديان وتفيض النفد والشعاب
وتسيح قلبان جفت من شهور غبر
والعشب ينبت بكل اسهولها والهضاب
ينبت بها انواع واصناف تسر النظر
ابساط اخضر على مد النظر ينسكاب
ايموج مع نسمة تبهج نفوس البشر
وتغني القمبره بالروض بعد الغياب
تجاوب ام سالم اللي صوتها به عمر
والزهر فوقه فراش طايره ما تهاب
مابين زهره وزهره من رحيقه تجر
ويفوح عطر الخزامى والنفل بانسياب
في كل جوا تنثر عطرها المعتبر
يامن تجيب الدعاء ياربي دعوى تجاب
دعوى عباد تمنى رحمتك والظفر
مقرن بن متعب الهرف