عواكيس 9/5/20008

@ زميلي معكوس السلام عليكم ألا تتفق معي بأن لاعبي نادي الهلال فقدوا شيء من الناحية النفسية خلال مباراتهم مع الاتحاد جعلهم يخسرون بهذه النتيجة؟
عاشق السهر - الزلفي
- كله من إدارة لا صرت رايح
@@ يا بو العواكيس الرجاء عدم التصريف وجاوب على السؤال؟ هل صحيح أن لجنة النابت قبلت استئناف الاتحاد وخفضت الايقاف مباراة ونص؟ ويلعب الشوط الثاني من لقاء الهلال؟ ولماذا؟
صديقك الوفي
محماس نجر الفنجال
- الرسالة واصلة من محل أواني منزلية
@@ يا أخ عواكيس يوجد رياضة ما لها أي فائدة في منطقة الرياض وهي رياضة التخسيس لوجود أنواع المطاعم والمغريات ما هي وجهة نظرك في هذه الحالة؟
صديق عواكيس الجديد
عادل ربيع القثامي
- المفروض يسوون غرامة على أصحاب الكروش
@@ شف معكوس أنا والله وصلت معي قل لي وش قصة الشباب مع أنصاف النهائيات؟ ما صارت نوصل لنصف النهائي بكل المسابقات وبعدها نطلع.. وش ينقصنا نجوم وعندنا وإدارة رائعة ومحنكة وعندنا تكفى قل لي والله تعقدت من كلمة نصف نهائي؟
شبابية بجنوون - الرياض
- ممكن يتحول "لنصف كبسة" سفري
@ يا معكوس وش اخبارك وشرايك بالهلال يستاهل هالظلم كله وبعدين من منافس الهلال لجنة الانضباط ولا الحكم أم الاتحاد؟
صديقك الجديد
خالد سعيد
- وإلاّ من رئيس النادي وإلاّ المدرب وإلاّ اللاعبين
@@ معوكس فديت خشتك ياليت تفسر لي تهرب لجنة الانضباط عن التصريح بالآلية اللي يتخذون فيها العقوبات!!
وشكراً منى الهلالية
"أم سلطان" - الرياض
- آلية لا نرى لا نسمع لا نتكلم
@@ هلا أبو العواكيس وش رايك بريال مدريد وخصوصاً الطائر الهولندي فان قول والأرنب الارجنتيني سافيولا والملك راؤول
اخوك الخبراوي
- مثل رأيي في ارطاوي الرقاص
@@ إلى صاحب المليون رسالة أو العواكيس أولاً: ما رأيك بمستوى الشلهوب هالسنة وتوقعاتك ما الذي يرجع مستواه؟
ياسر العزمة - الأفلاج
- إذا افتك من بعض الناس
@@ أبو العواكيس المملوح: وش رايك نحضر اعتزال اللاعب المخضرم ماجد لأنه يستاهل وأشوفك مباشرة واتعرف عليك من زمان هذي أمنيتي قل تم
صديقك الدائم
معاذ حمد الحميد - مرات
- أخاف أجي المهرجان واسحب الأضواء عنكم وعنه
@@ م. ع. و. ك. س لوائح الملاعب تمنع الدعايات غير المدفوعة الثمن. طيب فيه من يعمل دعاية للفصفص من قبل أبو فصفص شرايك بخرق النظم؟
س. الشمري
- فصفص بنكهة الشوكولاتة
@@ معوكسنا تراحيب الطلح بالمطر. وش رايك لو قدم الهلال شكوى للفيفا ضد ضد؟ تهقا يكسب؟ بلا تديلخ جاوب "بسراحة"
س. الشمري
- من يوم قلت "بسراحة" وأنا غاسل يدي
@@ يا أبو العقال المايل أستاذ معكوس ليش مالك معاذ ما يبدع إلا مع الهلال وبعدين وش رايك فيه بعد ما أعرس؟
فيصل السمير - الرياض
- خل الرجال في حاله اللي فيه "كافيه" والا كابتشينو
@@ أخ معوكس وش رايك في ليلو لاعب الهلال؟
صديقك الحريقي
- المراوح تعطلت لأنهم شبكوه في الكهرب غلط
@@ الصديق معوكس وش رايك بالظلم اللي صار للزعيم من الحكم الاسباني يا حليلهم ربعنا ان ظلمونا من بكره يعتذرون وننسى اخطاءهم ودي ان أبو صحن هو اللي حكم المباراة كان ما صار اللي صار
أبو منكاس ولد الزعيم - الرياض
- لو حكمها صحن كان شفت البيالات شغالة صح
@@ السلام عليكم يا حبيبنا معكوس أحب أقول ان بطولة كأس خادم الحرمين للأبطال "هلالية" وأنا اقترح لنادي الهلال المفضل أن يضعون مبنى ثاني يكون للكؤوس الذهبية وشكراً
عاشق السهر - الزلفي
- أقول رح "نام" بدري أحسن لك