هذا السدو والعام عام الحرف صار موضحٍ تاريخه بْصورةٍ لّه

أمنولٍ الغزل بالصوف
واليوم كثرت مصانعها
ومعلقاتٍ على المكشوف
وسط المحلات نجمعها
نختارها نظرةٍ بالشوف
حتى العبايه.. ومسفعها
سليمان عبدالعزيز السنيدي - الرياض
الله يا محلا زمانك يا السدو
يا كم بيوتٍ منك تبنى واسعات
عشنا بها بْوقتٍ مضى.. فعلاً بدو
ونْفوسنا بالعزّ عاشت شامخات
وحزنا الحضارة غصب عن خشم العدو
شوف الرياض.. وْمثلها بْكلّ الجهات
يا طْيور يا محلا صباحك.. والشدو
تغريدك وْشمس الضحى: سكّر نبات
فيصل الصاعدي - المدينة المنورة
يا زِين سدو البدو مع بنت الحلال
تنطاه بيدينٍ خبيره من حرير
فِيه العراقه والافاده والجمال
وكلٍ يحبه مِن صغيرٍ وكبير
جنوب مع شرقٍ وغربٍ مع شمال
بالمملكه شوفه مع وجُوده كثير
سعود عائش الحربي - جدة
هذا السدو والعام عام الحرف صار
موضحٍ تاريخه بْصورةٍ لّه
عساه عامٍ ينجح بْكلّ معيار
يصير نفعه واضح بْكلّ حِلّة
الخير يوجد والسبب فعل الاخيار
اللي ولو دربه تعَب ما تملّه
محمد مقحم المقحم - الرياض
يا داروين اللي ربا في مفاليك
وقزر حياته بين صنع اياديه
يعمل بيدينه وينزل عواليك
ويعيش في عزّه على مباديه
حمد عبدالله الوايلي - حوطة سدير
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد (تصوير / محرر الزاوية)