منظر بديع ينهب الشوف بسراق ياذكريات الخير لك حاضر الشوق

أنا اعطيكم خبر يوم المساكن كلّها من طين،
ترى فيها البراد وْسطح يا ما احلى هفاهيفه.
بجلسة سطح نجلس ونْتحدّث بالكلام الزين،
وإلى جا النوم نفرش به مطارح ، نومةٍ كيفة.
تحت نور النجوم اللي تراهش في حدقة العين،
مناظر فايتة راعي المدن لو زاد تثقيفه.
ترى في ها البيوت اللي بها الصورة سكنّا سنين،
ولا نعرف مسلّح يتعب الساكن بتكييفه.
ولولا انّ المطر يثّر بها عدنا لها هالحين،
ولا احتجنا لتكييفٍ كثيراتٍ تكاليفه.
محمد مقحم المقحم - الرياض
كانت بيوتٍ لها تاريخ مرموقي
الله يرحم كرامٍ سَكنوا فيها
باقي لها فالضمير الحب والشوقي
الله يا زين حاضرها و ماضيها
هاذي بيوتٍ لها فالدم وعروقي
مرباع في خاطري ماني بناسيها
محمد عبدالله الشهري- جبل اثرب
ياويل عيني دمعها صار محزون
على بيوت الطين وذاك الزماني
بين النخل وصوت المكينه له شجون
وشوفة جدرانها لها اسمى المعاني
عاشو بها اجدادنا والكل ممنون
تحملوا قساوة العيشه وضيق المكاني
ياما على سطوح المباني يتعشون
وقلوبهم بيضاء ولا فيهم اناني
خالد بن ناصر المخيمر.روضة سدير
قرية لبن في ظُف اشجار وهضاب
وبالسطح جلسه فوق احدها تِرِد الروح
هذي حياه مسجله جوف الالباب
شوفها يغني عن الهرج والبوح
وقتٍ مضى عنوانه إقلط وترحاب
مَع البساطه والقناعه ومسموح
واليوم حِنا مِن فضل منش السحاب
نِعيش في أمنٍ وخيرات وطموح
سعود عائش الحربي/ جده
ياريف قلب اللي من الشوق مشتاق
على بيوت شامخه مجدها فوق
من التراث اللي عليهاالدهر ضاق
وسطه قديم ديارفي عزها سوق
لاواهني اللي جلس فوق ثم راق
يشرف على بيوت لها ماضي ذوق
حوله جبال تتعب اللي على ساق
شوف الخضارولايجي شوفك العوق
منظر بديع ينهب الشوف بسراق
ياذكريات الخير لك حاضر الشوق
طال الزمان وحان في وقته افراق
والي بعدهم ماشي الخط ماثوق
حمد عبدالله الوايلي . حوطة سدير
لو يرجع التاريخ فينا له سنين
بعيالنا هالجيل حتى يعرفون
بيوتنا بالعز مبنيه بطين
ورجالنا هم الفخر يوم يبنون
من قبل يمسي الليل حنا قريبين
والكل يطلب من عياله ينامون
وفراشنا من قطن ناعم وبه لين
في الصطح أزين من مكيف وفريون
سليمان بن عبدالعزيز السنيدي .الرياض
بيوتنا طين و نجلس على الطاية
لاهين بالدنيا والناس ممسين
الكل يمزح مبسوط ويجيب رايه
فيه الوناسة تسوى كنوز الملايين
الرحمة على اللي بنا ذيك البناية
في ذمة الباري رحلو على الزين
مع معزي اللي جعل للاسلام رايه
في جنة الخلد بين انهار وبساتين
صالح البشري
صورة العدد
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com