رجْل الأمِن واقف بعزٍّ.. ولا سجّ في خدمة الحجّاج فعلاً تفانى

قدام بيت الله يبي يخدم الحاج
واقف على رجليه صبح وعشيّه
شوفوا ارجال الأمن صدقٍ ومنهاج
منهاجهم بالدين فطره سويّه
نشوفهم وسط المشاعر بالافواج
ولا شافوا الحجاج أدوا التحيّه
سليمان بن عبدالعزيز السنيدي - الرياض
كلٍ لبيت الله شد الرِّحال
بالحج والعمره مناه القبول
فيه الامن مع راحة القلب والبال
قبلة الاسلام في طيلة الحول
ياما شهد من توسعه طول الاجيال
وبعهد السعودي بالعنايات مشمول
سعود عائش الحربي - جدة
أشوف في هالصورة اللي تشوفون
رجل أمن صامد في المواقف وصبّار
صار الحجيج بكل يسرٍ يحجّون
بأسباب رجل الأمن تنظيمهم صار
اللي يحجّ اليوم راضي وممنون
الحج ما عد فيه تكليف واخطار
محمد مقحم المقحم - الرياض
عامٍ ورا عامٍ وحجٍّ بعَد حجّ
والمملكة بجْهودها ما توانى
جونا ضيوف البيت كلٍّ سلك فجّ
الله يحيّي ضيفنا يوم جانا
رجْل الأمِن واقف بعزٍّ.. ولا سجّ
في خدمة الحجّاج فعلاً تفانى
فيصل الصاعدي - المدينة المنورة
حجاجنا اللي وجهوا يم مكه
بعون الله صاروا في أيدي امينه
يامن تحج بدون تصريح مالك فكه
جنودنا لحدود الحرم مجودينه
خالد بن ناصر المخيمر - روضة سدير
ادامك الله يا بلاد اخوان نوره
حجاج بيته في ذراكم آمنين
كل فرد من الأمن قايم بدوره
على العمل صفوا بجد واقفين
واستعدوا لو يصير أية خطوره
يخدمون بطوع دايم والمين
المواطن آمن داخل قصوره
والحجيج بكل عام سالمين
حمد عبدالله الوايلي - حوطة سدير
اقدم بيوت الله على لارض نفداه
الكعبه الغرّى لها قدر عالي
كم مسلمٍ من حولها الفرض صلاّه
المملكه ترخص لها كُل غالي
من الحرير مصممينٍ رداه
يحرص عليها من كرام الرجالي
محمد عبدالله الشهري - مكة المكرمة
صورة العدد