صوت الصورة

يا حجيج الله حجوا بالسكينه
مملكتنا جنّدت شعب وحكومه
خدمت اللي جا يكمل ركن دينه
ويا جنود الحق يا وقفه وقومه
انتم رجال الشهامه من سنينه
محتمين الدار لاثارت همومه
من شمال ومن جنوب وفي مدينه
وخدمة الحجاج واجب في لزومه
حمد عبدالله الوايلي - حوطة سدير
جنودنا يا فخرنا .. يا ذرانا
يا سلمنا لأهل القلوب الرقيقه
خدمة حجيج البيت هي مبتغانا
نفخر بها بالصدق هذي الحقيقيه
خالد ناصر المخيمر - روضة سدير
يا مرحبا بالحاج في دار الإسلام
يا مرحباً باللي لفا في قدومه
لحجاجنا الغالين تقدير وإكرام
واللي وصل للبيت زالت همومه
دام الأمن والخير عامٍ ورى عام
حي الله اللي طيباتٍ سلومه
محمد عبدالعزيز الخنيفر - أشيقر
نوم العوافي في زحام الملبيين
ارقد بمان الله يا صغير وارتاح
دارٍ حباها الله بالشرع .. والدين
وفي خدمة الحجاج ما حن بنرتاح
سعد سهل المصارير - الخرج
من كل فجٍ عميق يطلبون الله
وفود ضيوفٍ على الرحمن في بيته
أمن وأمان بترحاله وفي حله
رجل أمن يستمع لك لين ناديته
والحج مقبولا على ارض كلها قبله
ابشر بخير ادا الرحمن لبيته
وعودا حميدا على دارك مع الرحله
تعود بلا ذنب مثل اللي أم جايبته
سعود عبدالعزيز الهزاع - نعام
من جا لدار الخير ياجد من الخير
ياما له التقدير وأيضا التراحيب
حجاجنا جونا وجيهٍ مسافير
واللي مشى بالطيب يستاهل الطيب
في دارنا ما فيه نقصٍ وتقصير
كل مايبي موفور بأعز ترتيب
هذي نعم تحتاج شكرٍ .. وتقدير
الله كتبها عالم السر .. والغيب
ريان محمد الخنيفر
في خدمة الحجاج وافين.. ويبين
جنودنا اللي بالمهمات شجعان
وهذا الصغير اللي من يسار ويمين
جمعٍ غفير وصار بالأمن تحنان
بشائر القحطاني - الرياض
نرحب بمشاركاتكم الشعرية بمناسبة اليوم الوطني السادس والثمانين للمملكة العربية السعودية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق