يالله عساه بجنة الخلد يالله موحد الأمة على منهج الدين

في ذكرى اليوم الوطني الرابع والتسعين للمملكة العربية السعودية كتب الشاعر عبدالكريم ابن خزيّم بيتا يقول فيه:
يالله عساه بجنة الخلد يالله
موحد الأمه على منهج الدين
وكانت المجاراة للبيت من الشعراء:
وعبدالعزيز مشيد طول مبناه
رام الطويله بعدما جاهد سنين
راية هل العوجا على كل ممشاه
شعاره التوحيد والدين واللين
واسس قواعدها ولو ثاروا عداه
كم عجة ثارت على منظر العين
لكن ابوتركي مشا يرقب خطاه
وحد اراضيها على الشبر شبرين
يالله عسى قبره رياض ومثواه
نعيم جنه كلها اشجار وبساتين
واخوان نوره كملو خير مبداه
حكامنا الي على العدل وافين
حمد عبدالله الوايلي - حوطة سدير
يالله ياللي كل صعب ٍ تحله
يقابل الدعوات من اللي مصلين
عسى موحد مملكتنا تظله
في روضة الجنه وحور ٍ من العين
عبدالعزيز الفيصلي مابه الذله
حامي حما مكه وطيبه بحدين
الديِن ويا السيف والخير كله
والشعب في رايه وفعله محبين
مشعل بن صنت العصيمي/الخرج
عبدالعزيز اللي حصد فعل يمناه
دولة رجالٍ تحت حكم السلاطين
يشهد لفعله كل ماحل طرياه
قبل أصدقاه أعداه في الغرب والصين
ساروا على نهجه وساروا على خطاه
املوكنا ذخر الليال الميامين
يحق للشعب السعودي المباهاه
بالمملكة ورجال مثل الشياهين
ماجد الهذلي
عبدالعزيز مطهر الدار كله
من اهل الفتن ومطاوعين الشياطين
رفع عمود الدين والسيف سله
وتبدلت عسرات الايام بالين
زال الجهل والظلم والعدل حله
واصبح جميع الشعب لامره مطيعين
عساه بالفردوس عالي محله
يارب ياقابل صلاة المصلين
سعود ثواب سليم المطيري
عبدالعزيز اللي متعّب مطاياه
رد الرياض بقوة. ٍ مابها لين
مليكنا يالله عسى الحي يجزاه
جنات عدن ويرفعه بالموازين
الخير ف معزّي من الله أعطاه
حل الأمن والشر ولاّ لها الحين
من بعده رجال ٍ مشت دوم بخطاه
ملوكنا أهل الظفر تحكم الدين
عبدالكريم ابن خزيّم - البكيرية
مؤسس الدوله توكل على الله
وجمع قبايلها ووحد ملايين
مخلص لدينه راجي(ن) عفو مولاه
والشعب جو له مخلصين ومحبين
ومن حبهم له كل من جاه والاه
وصارو معه بارواحهم لهم مفادين
وهذا الكيان وربي اللي تولاه
وحماه ربي في معزته للدين
ومع خادم البيتين للعز باعلاه
مادام مع شعبه فهم به عزيزين
ومحمد اللي سانده يوم ولاه
واصبح ولي العهد في العسر واللين
سليمان بن عبدالعزيز السنيدي-
الرياض