الرزق بيد الله وناخذ بالأسباب والآدمي ما ياخذ الا نصيبه

حرفه لها في ماضي العصر ازمان
عهد الجدود اللي مضى والحضاره
يوم النجاره تمتهن فن .. واتقان
واليوم احيوها وصارت تجاره
قاموا بها منهم صحيحين الأبدان
كدوا ومدوا واكسبوها شطاره
ذكرى لها من يطلب الرزق عنوان
حمد عبدالله الوايلي - حوطة سدير
للبيت بِيْدينا تراثٍ شغلناه
وزِدناه إتقان وسرعه وجوده
ومن حبَّنا او تقديرنا له حفظناه
ونخْدِمِه في جِدٍ ونفسٍ ودوده
ومهما يطول الوقت بالقلب صنّاه
وعليه اضفنا جهود بالحيل محموده
سعود عائش الحربي - جدة
نجاهد الدنيا ولو كلها اتعاب
نطرق دروبٍ قاسيات وعصيبه
الرزق بيد الله وناخذ بالاسباب
والآدمي ما ياخذ الا نصيبه
عبدالله بن عبود السهلي - الرياض
صوره و فيها للمحبين تذكار
نذكر بها و قت مضى يا جماعه
شغل مرتب مابين دروج وكمار
يازينها و يا حلوها من بضاعه
ماهو عيب الشغل لو كنت نجار
العيب بالشكوى من كثير المجاعه
كم واحد حده يدور للاعذار
عن دورة الارزاق طاوي شراعه
خالد بن ناصر المخيمر.روضة سدير
حرفة قديمة من تواريخ الأجداد
أهل القلوب اللي عفيفه.. نظيفه
وقتٍ مضى يا ناس ما عاد ينعاد
يا رب لطفك والحياة الشريفه
بشائر القحطاني - الرياض
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق