ما أجمل الصوره على بيض الاوراق صوره رسمها خالق الكون كلّه

البَر مِنْ فضله سِقَته الهماليل
بالميّ والخضره وزانت مِطالِيعِه
وعلى أدِيمه بث أحلى الأكاليل
ويزداد روعه حين يكمل ربيعِه
ويابس الأشجار يصبح مِضَالِيل
سبحان مِنْ ذي قدرته مع صنيعه
صفحة "خزامى" حبّها له مِداليل
الاسم والمضمون وسيره بديعه
سعود عايش الحربي - جدة
الحمد لله خير ربي علينا
لين ارتون فياض وفياض وفياض
بكرا الربيع يفز بأمره يجينا
والطير من فوق الزهر ينطرب هاض
وريح الخزامى بالصحاري يبينا
والناس تسعد بين شعبان ورياض
عبدالكريم بن خزيّم - البكيرية
ما أجمل الصوره على بيض الاوراق
صوره رسمها خالق الكون كلّه
هذا الربيع اللي بدا وقت الاشراق
يفز له قلبك وهو في محلّه
هذي جريدتنا بها كل الاذواق
تعطيك مطلوبك قدوع ودلّه
سليمان عبدالعزيز السنيدي
منظر نشوفه بالجريده يسر العين
نشوف سيله والعشب على حدّه
تخالط شعيبه مع نباته نبات زين
عسى الله يعلّه بسيل وافي مدّه
حمد عبدالله الوايلي - حوطة سدير
حيّ الربيع وحيّ ذيك المفالي
حيّ الغدير اللي يشوق المكاشيت
في شوفها يا ناس يرتاح بالي
اي والله إنها فرق عن جلسة البيت
بطلعة خلا صرت اتأمل لحالي
كل ماطرا لي بيت من شِعر غنيت
بعد التقاعد صرت من الشغل خالي
اسج يم البر لا أصبحت وامسيت
خالد ناصر المخيمر -روضة سدير
الحمد لله ربي ليس له ثاني
اسقى بلادي جليل الملك وارواها
اناظر اليوم وسط البر غُدراني
الناس والطير والغُزلان تنصاها
وارى الخُزامى ونبت الشيح بالواني
وعلها بالدّيَم مرات واسقاها
محمد عبدالله الشهري - أبها
هذا الربيع اللي له القلب يشتاق
أرضٍ بها زين العشب والخزامى
أرضٍ تسر الروح في كل الآفاق
أحبها يا ناس هذا المرامى
سطام المسردي - الرياض
صورة العدد السابق