يا زين شوف النوق حول الغديري منظر يشدّك يوم تروي عطشها

شف النياق وشوفته تشرح البال
في روض أخضر مرتعه فالبطيني
المايّ من دونه من الجال.. للجال
ما ناقصه يا كود قرمٍ فطيني
سفينة الصحراء على كل ابو حال
ما هي بشبك حايره له حنيني
يوم البداوه يوم هذيك الأحوال
ما فيه غيره ناجده يا ضنيني
خليف فهيد الحربي - الرياض
هذي عطايا الله رعت غبّ الأمطار
فوق الصياهد تجتلد حزّة عصير
البل فرحانه ومن حولها أبحار
من فضل ربي تاكل العشب وتغير
كله مجاهيمٍ من النوق الأخيار
راع الحلال يراقبه يرجي الخير
علي الرشيد - رياض الخبراء
يا مبدع التصوير بين الحلالي
صوره جميله تستحق الإشاده
منظر طبيعي فيه كل الجمالي
ستٍ من الخلفات وفيها زياده
على الغدير وتشرب الما زلالي
عاكس خيال الغاليات برياده
يالله تزيد الخير في كل حالي
ويرتاح بال اللي يدوّر سعاده
حمد عبدالله الوايلي - حوطة سدير
يا زين شوف النوق حول الغديري
منظر يشدّك يوم تروي عطشها
تروي ضماها بعد العطش والمسيري
صارت تنادي بكل صوتٍ جمعها
صلاح المبطي - الخبر
افرحوا يا ربعنا فالخير جاكم
ربّعت دار الفخر لا تتركوها
الربيع أقبل عليكم واهناكم
أرضنا خيرات وانتم شاهدوها
واهناكم أفرحوا ربّي عطاكم
هذي النعمة عليكم أحمدوها
محمد عبدالعزيز الخنيفر - أشيقر
لبكار تشرب من قراحٍ زلالي
واللي يحبّ النوق في شاربه طال
يا حظ من له شُمّخ العيس مالي
حليبها للضيف من فوقه اجفال
ترى محظها عند الفهيمين غالي
من يشربه ما زار مشفى محال
وأحبّ وسط البر شوف الحلالي
ترعى بمفالى نبتها ألوان وأشكال
محمد عبدالله الشهري - جبل أثرب
للسيل نعمه والمطر ينعش الحال
والرزق عند اللي له الناس يدعون
شوف الحلال اللي على الأرض تجتال
يسر عين اللي من الضيق مغبون
والإبل تشرب والسماء كلّه خيال
هذي حلاة البر والرزق مضمون
خالد ناصر المخيمر - روضة سدير
ربّعت أرض الفخر في كل ديره
شوفوا الخيرات في أرضه مليّه
وابتدوا العربان كلٍ في مسيره
يا عسى الرحلات يا ربي هنيّه
وارضنا يا زينها أرض الجزيره
يا هني اللي بها روحه.. وجيّه
ريان محمد الخنيفر
نرحب بمشاركاتكم الشعرية
وما تلتقطه عدساتكم من الصور الهادفة
والطريفة على إيميل الخزامى:
rb-khozama@alriyadh.com
صورة العدد السابق ‫‬