اللغز

لغز الأسبوع الماضي الشاعر أحمد بن ناصر المحرج من الرياض والذي يقول:
الوسط ملفوف ودايم صغيرة
موجودةٍ في بنت مختلفة احجام
بالعين شفناها ترى مستديرة
وإلى ضغطت الراس تروح قدام
وترجع بعد لحظات بحاله خطيرة
متغيره في لونها والجسم حام
وقد وصل للقسم عبر البريد الإلكتروني سبعة وستون حلاً لم تصب رمعات الكثير منهم والذين أصابوا الحل:
يا مرحبا يا اهل الوجيه السفيره
اعداد ما طيراً على الجوّ حيّام
لقيت حل اللغز من بعْد حيره
ولاعة ٍ فالمركبه مالها ارقام
مقرن بن متعب الهرف - الرياض
اللغز وافي من رجال جديره
بالحب والتقدير في كل الأيام
وفي كل تأخيره يقولون خيره
صبرت وجبت الحل يانسل الإكرام
وبداخل الموتر تلاقي المثيره
ولاعتن لقيتها قبل ماأنام
صالح الزرير التميمي - الرس
ياحي منهوله اليوم سيره
وفي الخصايل محترم كل الايام
عنده على صوغ المعاني بصيره
لاجاب لغزه كنه الوصف رسام
وانا بحل اللغز وابدي سريره
ولاعة لو تحترق تحرق خيام
حمد عبدالله الوايلي - حوطة سدير
الصبر محمود ترى فيه خيره
يعطيك فرصه للتفكر بالأيام
لغز الخزامى واصل كل ديره
والمحرج اللي ضبطه وزن واحكام
الحل ولاعه عسى الله يجيره
هذا جواب اللغز راعيه مقدام
عبدالمحسن بن محمد المحيسن - رياض الخبراء
يا أحمد المحرج بيوتك مثيرة
يا كثر ما تظهر لنا عبر الأعلام
هذا جواب اللغز جاك تعبيره
ولاعة الموتر عسى حلنا تام
طلال الرشيد - الجبيل الصناعية
عبر الخزامى وروضته مع غديره
ابعث سلامي لاحمد عالي الهام
واوصله مني لحل الصغيرة
ولاعة الموتر حقيقة بالارقام
فزاع عبدالله الشمري - حائل
يا مرحبا بك عد رمل الجزيرة
واعداد ما ينشر لنا عبر الافلام
الحل ولاعة وشغله خطيره
في داخل الموتر على مر الايام
علي الرشيد - رياض الخبراء
يالمحرج الالغاز ما هي عسيره
واليوم هذا اللغز تصميم باحكام
وارسلت رمعه ولا فيه غيره
ولاعة (ن) بالجيب تضغط بالابهام
محمد بن عبد الرحمن - أبو دحيم
ونثرا هناك حلان فقط صحيحان من حوالي ثلاثين حلا
خلف بن عايد السّحوم - القصيم، منصور شليويح العنزي - الرياض
لغز الاسبوع
كتبه الدكتور صالح بن محسن الجعفري من الرياض ويقول:
ياويش رجل له علاقه بالايام
خمس حروفه والليالي سريعه
أوسط ثلاث حروف بعقول واجسام
ورابع وخامس حرف ياكثر ريعه
نستقبل الحلول على البريد الإلكتروني
rb-khozama@alriyadh.com
وذلك خلال أربعة أيام من نشر اللغز.