اللغز

كتبه للصفحة الشاعر حميد الصاعدي والذي يقول:
انا حيرتني بنت أفكر بها واحترت
هنوف عملها يشغل الفكر ويحير
عملها مخالف للطبيعه ليا فكرت
لكن كل شي بتالي الوقت متغير
وجاها كفيف وقام مبصر مثل ماابصرت
ولا تأمنه عقب أبصر يقوم ويطيٍر
وقد وصلت رمعات اللغز 27 رمعة، ولم يصب الحل سوى:
هلا مرحبا ترحيبة دون دز الكرت
على ايميل صفحة شعرنا الجزل والنير
وانا جبت حل اللغز اسرع من اسرع فرت
ترى للبيض فقاسه وللحجم تتخير
احمد بن ناصر المحرج-الرياض
سلام عليكم ياحميد ان جيت اوسافرت
قريت اللغز بالصفحه وهو من طيب خير
نقول الحل فقاسه ماهي خفيه اذا ناظرت
يقوم الفرخ في جوفه وهو ضعيف وصغير
علي رشيد الرشيد - رياض الخبرا
انا قلت لغزك وارد حيل ماقصرت
انا والله اني فيه بالحيل متحير
انا قلت فقاست هل البيض اناغمرت
هاذي رمعتي لك قلتها مقدر اغير
سعد صنهات السهلي - الدرعية
ترى اللغز حليته وانا فيه ابد ما احترت
ترى الحل فقاسه و انا فيه متخير
وصبح الثلوث الحل ياصلك لابصرت
وصح الله إلسانك و لغزك لهم حير
محمد بن عبدالرحمن _ البدائع
لغز الأسبوع..
كتبه للصفحة الشاعر سالم البشري من الجبيل ويقول:
اثنين متسامين يطرون بالخير
حرف صحيح وبعده اثنين عله
واحد منى من له شويهات وابعير
واما السمي وصف الحياوي بمحله
نستقبل الحلول على البريد الإلكتروني
rb-khozama@alriyadh.com
وذلك خلال أربعة أيام من نشر اللغز..