الخير فاتك يامفوّت صلاتك

بيت وصدى

كتبه للصفحة الشاعر عبدالكريم ابن خزيّم من البكيرية ويقول:
الخير فاتك يامفوّت صلاتك
خص الفجر لاتسهر الليل لوطال
وكان صدى البيت من الشعراء:
واحرص على الخيرات مدة حياتك
تلقى جزاها يوم توزيع الاعمال
خلك تقي والحياء من صفاتك
هذي تراها تنقذك يوم الاهوال
خلك مع الأخيار أكد ثباتك
حتى تفوز بصحبة رجال ابطال
لا تتبع الشيطان تكثر خطاتك
كم واحد خلاه من ضمن الانذال
علي الرشيد- رياض الخبراء
كانك تريد الخير وترجي نجاتك
صل الفروض الواجبة وخل الاهمال
خل التهاون وانتهض من سباتك
ترا السهر ما هو فخر يا ابن الابطال
ذي فرصة حذرا تضيع بحياتك
احرص على الاوقات مع زود الاعمال
خل العبادة دايم هي سماتك
لا تغرك الدنيا ولا جمع الاموال
محمد عبدالعزيز الخنيفر- اشيقر
احسب حسابك قبل تعلن وفاتك
وصل الفجر وأقراء التحيه والانفال
قدام توزن سيتك وحسناتك
يوم الحشر رهيب يضرب باالامثال
سدد لدينً بأول الوقت فاتك
بعض الحمول ثقال من الصعب تنشال
هذي رسايل من هل العرف جاتك
يصير شيً ماخطر لك على البال
سعد صنهات السهلى- الدرعيه
شهادة التوحيد فيها نجاتك
وذكر النبي المختار هو زين الاعمال
كل الفروض اللي عليك بحياتك
لازم تاديها على كل الاحوال
احرص على كل الفروض وزكاتك
وصوم رمضان وحج ليا زانت الحال
وخل العلوم الطيبه من صفاتك
كلش حسبة الرب من دق وجلال
حمد محمد الحنو
يامومن افهم خيرمافي صفاتك
دينك ودينك لاتخليه لازال
يسعدحياتك ثم ينجي مماتك
الله يجيرك يوم صكات الاهوال
هومكسبك ترى قصيره حياتك
لوكثرت الايام والجاه والمال
جاك الفنى يلي تدورنجاتك
ماينفعك عم ولايرحمك خال
حمد عبدالله الوايلي
ترى عمود الدين في خمسة اوقاتك
هن فاتحات الخير في كل الاعمال
ما تقبل الاعمال ويا حسناتك
ألا بفرض الدين في وقته إجلال
هذا رصيدك قبل ياتي مماتك
حافظ عليه وطهّر المال والحال
يا باغي الجنّه نصيحه وجاتك
خل النصيّحه دايملّك على البال
مشعل بن صنت العصيمي- الخرج
ولا أنت مخلد ولا ضمنت لحياتك
قل لي وش المحصول في كل الأحوال
خل طاعة الله دايمن هي سماتك
وترا السهر يا صاحبي سبب إهمال
هذي رسالة كان تبغى هناتك
في طاعة الله عز هي مضرب أمثال
وهذي نصيحة كان ترجي نجاتك
قدامك النيران تشعل لها اشعال
ريان محمد الخنيفر - اشيقر
عليك بالتقوى تنور حياتك
هي مكسبك تنجيك في يوم الأهوال
والزم فروض الدين والزم صلاتك
واحذر تهاون بالعباده وتحتال
والفجر مشهود وخله سماتك
لاتترك المفروض ياطيب الفال
ترى العمل يبقى معك في مماتك
والزم عمود الدين والعمر رحال
عبدالمحسن بن محمد المحيسن - رياض الخبراء
نصيحة مود لك في حياتك
لعلها تلفى على قلب رجال
عمود دينك يامدور نجاتك
أنيستك بالبيت لامال لاعيال
علم بها اخوك وعلم خواتك
دام ان حيلك زين والعمر مازال
ثم استقم واندم على خير فاتك
تصبح سعيد دوم ياطيب الفال
خل حذفك لقدام قبل مماتك
تبقى رصيد ولك ذخر كنها جبال
وعلى صلاة الفجر آخر وصاتك
تكون بذمة ربك وصحبة الآل
و لو دامت لغيرك ماكان جاتك
والله يديم العز في ظل الأبطال
صالح محمد البشري - الرياض
قم واذكرالله قبل ينعى مماتك
والطين من فوقك يناثر وينهال
صل واسأل اللي يحفظك في سباتك
يغفر ذنوبك يوم لا ينفع المال
حافظ على فرضك وطلع زكاتك
واحفظ لسانك من هرج قيل والقال
واحسب حساب الآخره في حياتك
دامك من الأولى مغادر ورحال
خلك مع الله وابتعد عن عداتك
ترى صديق السوء شيطان غوال
علي الزولاني الفيفي- بيشه
بيت الاسبوع
كتبه حاتم عبدالله الشاهر من الرياض حول موضوع وجوب عمل حملة اعلانيه لتطبيق غرامات المرور الجديدة وذلك لتوعية قائدي المركبات والبيت يقول:
ليت المرور يوضح امر الغرامات
بالتلفزه والا بصحف واذاعه
نستقبل صدى هذا البيت بأربعة أبيات حتى يوم الاربعاء القادم عبر الإيميل:
rb-khozama@alriyadh.com