بيت وصدى

كتبه للصفحة الشاعر مشعل بن صنت العصيمي من الخرج ويقول في بيت اجتماعي:
الوقت غلاب والايام غلابه
عشنا وشفنا واخذنا من تجاربها
وكان صدى البيت من الشعراء:
أيام وأيام وتعرف وش هي أسبابه
والنفس لازم لها من هو يعاتبها
واجب على كل شخص يحسب حسابه
هذي نصيحة على الأوراق نكتبها
وابعد عن اللي بفعل الطيب نصابه
سلوم يا شينها وياشين صاحبها
الناس من فعلتك بالحيل مرتابه
ومن ذي فعوله ترا ربي يحاسبها
محمد عبدالعزيز الخنيفر - أشيقر
الطيب يصعب على من يجهل أسبابه
حتى الحمول الثقيله ما يحس ابها
حذارك من ضحكة اللي يضرس أنيابه
كل الأمور الردية صار صاحبها
واحرص على اللي كريم فاتح بابه
دايم علومه رفيعة ما يخربها
واللي يشجع طريق المجد يرقى به
والنفس ترتاح عند اللي يناسبها
علي الرشيد - رياض الخبراء
دنياك يابو صنت للناس لعابه
شيهانة تفرس الصيد بمخالبها
و الموت طلاب ما يمهل لطلابه
لحان وقته ذلوله جاك يشعبها
المسعد الي معه مصحف ويقرابه
ويطيع ربه ويسعى في مناكبها
لو كل واحد حسب للقبر وترابه
بالجنة الناس حاضرها وغايبها
حميد العوفي الصاعدي
الصمت حكمة وكل يحسب حسابه
ولاخير في رفقة ملح مشاربها
والعقل نعمة وغض الطرف له بابه
والنفس واهواءها لازم نحاربها
والعلم يبقى وليل الجهل متشابه
والعمر فرصة وتقوانا مزاهبها
صالح البشري - الرياض
الناس من قادم الأيام مرتابه
تتعب وتشقى لَجِل تأخذ مطالبها
نسمع كثير البشر للوقت عتّابه
واقدارنا عند ربّ الكون كاتبها
مال ابن آدم سوى ما خِطِّ بِكْتابه
مهما سعى بالقدم وابعد مذاهبها
الرزق مقسومِ ما به رزقٍ نْهابه
محدٍ خذا شربة من فم شاربها
والعاقل اللي قُنُوع امْهَدِّي أعصابه
في طاعة الله حياته دوم مكسبها
ناصر جمعان آل عوض - وادي الدواسر
نجري ورى الوقت نبغى نلحق ركابه
وخانت بنا ايامنا وخفت مكاسبها
عشنا بها مثل طير كسر مخلابه
يطرد ورى صيدته ماهو بقاضبها
دنيا ذكرها بديوي قال لاصحابه
ايام في غلبها واحيان نغلبها
بدر الحزيمي - الرياض
بعض البشر لا نصحته زاد بعتابه
الناس هي تنصحه لا ما يجاوبها
بالدين قصر وتلقى دايم غيابه
دنياك ما هي طويلة وانت حاسبها
الآخرة هي طريقك واحسب حسابه
الطاعة اترك دروب الغي جنبها
خلك من اللي حفظ دينه مع كتابه
وفي طاعة الله ترا الخيرات تكسبها
ريان محمد الخنيفر-أشيقر
بيت الأسبوع
ارسل للصفحة الاخ سعد الغريري طلبا بإدراج بيت الشاعر عبدالله بن سبيل الذي يقول:
لا تاخذ الدنيا خراص وهقوات
يقطعك من نقل الصميل البرادي
نستقبل صدى هذا البيت بأربعة أبيات خلال ثلاثة
أيام من يوم النشر ويكون الإرسال عبر الإيميل:
rb-khozama@alriyadh.com