وش جابها

الشيبة اللي لفتني عقب ذاك الجمال
ليت الزمن يلتفت واقول وش جابها
مابين هم الهدف اللي بعيد المنال
ومابين هم الحياة اللي بها ما بها
ومابين كلمة وفا ماخذت عنها بدال
الا هروج يفج الصدر مضرابها
وإذا احتريت الجزا يجي لطيب الفعال
سمعت عوج وسيرة منشلع بابها
بعض الحكي وقعه اقسى من سهام النبال
يهدم بيوت الغلا ويقطع اطنابها
وذكرت كلمة وانا طفل صغير تقال
لا تقرب الشجرة اللي حولها دابها
دنيا أولها طرب وآخر مداها زوال
مجبور اسير ركابي باول اركابها
صبرت صبر الجمال اللي تشيل الثقال
ابي عيالي تعيش وترفع ارقابها
من شانهم طفت بالدنيا جنوب وشمال
ما ابغى حياة العوز تلمسهم بنابها
موتي ظميان بشرف والما قدامي زلال
اخير لي من حياة مطمن اشنابها
اما نعيش العمر عيشة عزيز الرجال
وإلا نموت بقهر في راس مرقابها