حنيت للماضي بعد شاب راسي

وذكرت مجلاسي بهاك المجبب
في عز شيباني على عز ناسي
اطيعهم وألهم كمان أتلبب
واحوف كيف البن لطرد العماسي
مقند ٍ في الهدف ذيك المربب
ومقداع تمر ٍ من كبار التباسي
والسمن بعض احيان فوقه يصبب
كرماتنا مهيب كرمت طفاسي
والضيف عنا دايم ٍ ما يغبب
نعطيه ماجوبه بليا انقعاسي
ضيف ٍ مقَبل ضايف له مشبب
قولة هلا قبل الشبب له لباسي
وحيل ٍ على كبار الصيانا مكبب
يقلط عليها والكرم ما يقاسي
وهبه من الله ما يجي من تسبب
واليوم في هاك الزمن من نواسي
ياهل الفكر والراي كيف التطبب
في جيل هذا الوقت حب الكراسي
وايضا على السيَّار وربعه ملغبب
في ظل حكم ٍ للعداله مراسي
حكم الشريعه في نظامه محبب
يا الله عساه بكل صبح ومماسي
أمن الوطن والخير فوقه يهبب
واختامها يا الله تقبض أنفاسي
وانا بسجده خاشع لك تحتبب