الحزم عنوان

نادى المنادي والجحافل ملبين
الجيش والقوات لابو سلمان
والشعب والجيران واللي موالين
تنقاد لامرك ياسلايل كحيلان
العلم بين لاعدم يا احمر العين
ياللي فعولك ترجح بكل ميزان
شعب السعودية على العسر واللين
لامرك مطيع وفي ذرى حكمك يصان
لبيه ياهيبة جميع السلاطين
اقولها والفعل للقول برهان
فعل نشوفه في جميع الميادين
سلمت ياسلمان ياذرب الايمان
فالسلم تشهد لك صدور الدواوين
ووقت الوغى منهو يعاديك غلطان
العاصفه هبت على خاين الدين
الحوثي اللي تدعمه دولة ايران
هبت عليهم من صعوط المجانين
اللي لهم في عالي الجو ميدان
باللي تقل الموت تحت الجناحين
يقودها شيهان من نسل شيهان
يتلها صوب السما والله يعين
حتى تغيّب عن مدى شوف الاعيان
ناوي على مهجاد روس الشياطين
نصر لدين الله من دافع ايمان
يهد مثل الشخب والقوم لاهين
كنه شهاب هاوي فوق شيطان
يحدد الاهداف دقة وتقنين
في شاشته عنده خريطه ونيشان
لامن رمى ثارت وقوعه براكين
عقوبةٍ عجله على كل خوان
يلهب بنيرانه حصون المعادين
لا من رمى كن الصواريخ ودان
العلم واضح بالحجج والبراهين
والوقت بدري والوعد مابعد حان
أسراب رمزيه تخط العناوين
والجيش توه والحرس ما بعد بان
هذا كتاب المملكة والمضامين
كتاب من سلمان والحزم عنوان
بندر بن ظافر بن ظفير