اللغز

كان كاتب اللغز الماضي الشاعر صلاح اليابس من الدمام والذي يقول:
ياويش خطٍ فوق خطٍ يخطا
واللّي يخطه مسرعٍ ماهو مظبوط
أحدٍ بعد خطه نشوفه مغطا
وأحدٍ بعد خطه مقيد ومربوط
صلاح بن عبدالله اليابس / الدمام
وتوصل للحل شعرا:
صلاح خذ حلي جواب مغطى
ممليه من فكر على اللغز مربوط
خط الكفر عقب الفرامل يخطى
عقبه شلل وان عاش بالسجن مقطوط
احمد بن ناصر المحرج/الرياض
ياللي على رجليك نوب(ن) تخطى
احذر من التفحيط بعد انتهى الشوط
واسم الكفر بالقار شفله معطى
كم واحد(ن) شفناه بالارض مشحوط
ياليابس خذ ردن لكم ماتبطا
خذ مني حل اللغز أبوخط و خطوط
هذا مفحط قط للموت قطا
يموت والا داخل السجن محطوط
د. قاسم بن محمد الداود
بعض البشر يمشي بمشية تمطى
تنقد على شغله ولا هو بمضبوط
خط الفرامل ظني انه يخطى
نتايجه شينه وبالشر مربوط
علي رشيد الرشيد-رياض الخبراء
لو يخفى المخطي ترى ما تغطى
لازم تمرر به على النصح والسوط
بأسباب سرعه خط بالدرب خطا
من الكفر واضح مصور ومضبوط
طلال الرشيد- الجبيل
بالخط شفت الحل ما هو مغطى
سحبة كفر مضغوط مضغوط مضغوط
دوسة بريك خط بالخط خطا
صلاح جاك الحل واللغز مضبوط
محمد أبو دحيم- البدائع
صلاح صلح لغز مربوط بطا
والطاء لحاله بس ماعنده انقوط
دقت ابريكن خطت الخط خطا
من سرعته فالخط سواله اشخوط
سعد صنهات السهلي- الدرعية
في الحل بعض الناس حاول وشطا
وانا في حل اللغز مغرم ومبسوط
للسير خط بكل شارع يخطا
مثل القلم خطه موثق بمخطوط
عبداللطيف الحُمَيَّانِي- عنيزة
أنا قريت اللغز أشيله وأحطا
لما عرفت الحل واللغز مضبوط
الحل تفحيطه تبين بخطا
على السفلت اللي على الأرض محطوط
حبيب فريح الحربي- البدائع
وهذا حل لا يعتمد على وزن :
مرادك يا صلاح بهذل الشباب والشرطة
هو التفحيط خطه يسحب على الجنوط
الله يهدي من سلم بعد الحبس ورطة
ويرحم من بسببها على اللحد محطوط
ياسر السويس من الرياض
لغز الاسبوع
يكتبه للصفحة الشاعر شلاش بلال العنزي من الرياض ويقول:
ياويش بنت من الخلايق تعشيك
تاكل لحم من دون تذبح ذبيحه
من غير طبخ ولا تغرف بصيانيك
بنت رغبوها الناس لوهي قبيحه
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار إحدى الزاوتين.