البوح والصمت

البوح وش ذنبه إذا خانه الصمت
والصمت وش عذره إذا خان بوحه
وأنا لو إني ما حكيت وتكلمت
الصمت أخير من الكلام وجموحه
على سكوتي ما أذكر أني تندمت
لاصار بعض الحكي يقتل طموحه
إلا القصيد اللي بعمره تقدمت
هو صوتي اللي نصف عمري بنوحه
وياليلي اللي روّح أتلاك مانمت
عاذرك.. وأطلبك العذر والسموحه
أهفيت قسمك في منامي وسلمت
جفني، لها جوس السهر وأنت روحه
وشفني على كل الخطايا تقسمت
بين الهموم وبين جرحي وفوحه
وشفني على كل المواني تعممت
واكسبتها نصف الشقاء والملوحه
وهذا أنا.. رغم الشقاء ما تحطمت
أشيل همي وافتخر به وأنوحه
صابر لو أني مع زماني تخاصمت
ساكت لو أن القلب تنزف جروحه
ويكفيني إني لا انجبرت وتكلمت
كتبت شعرٍ ما قصربه طموحه