ذكرى ولكن غير كل الذكريات

ذكرى ولكن غير كل الذكريات
فيها تجسد فرحة اليوم الكبير
يوم الركايب بيتن بمغرزات
وردن هيت ولا لهن غيره مصير
من كثر سج اعصي أهلهن ضامرات
مثل القطا اللي واردن صوب الغدير
في رأي من عيت عيونه لا تبات
لو كان حطوا له فراش من حرير
الليل يسري والنهار امعقلات
والزاد وجبة تمر والأخرى مضير
ساقه طنا ال سعود واعذر با الحيات
اللي طناهم ينتهي فيه المصير
اما حياة في ظل المرهفات
والا ممات بعد شر مستطير
راسه صطر من كثر حب الطايلات
ولا هام عز الا ورى العلم الخطير
جاء للرياض ومستعد (ن) للممات
وسيفه حلف ما عاد يرجع في الجفير
دخل عليها الفجر قدام الصلات
وساعة وبشر مع مؤذنها البشير
الملك لله ثم لحام الجاذيات
عبدالعزيز ولا أحد بملكه خشير
ومنها انطلق تحرير في كل الجهات
وتعاهد النصر المؤزر والمسير
أهداف ما هي مدخلات ومخرجات
وأوامر تصدر ينفذها وزير
أهداف أبو تركي يحقق معجزات
توحيد فكر بعد توحيد الضمير
وملاحم تهرج بها سبع اللغات
في وقتن اقشر وقت والواقع خطير
واحد وطفي له فتن ومنازعات
وخلي الجميع اصفوف من خلفه تسير
ما والله احدن زيد سوا هالسوات
لا قبل صار ولا بعد نالي يصير
عاشت بلاد العز في خير وثبات
في ضل أبو متعب بامان وكل خير
وولي عهده كانها راحت وجات
سلطان سلطان السعد مغني الفقير
واخوانه اعيون لوطنهم ساهرات
همه ذراعنا عن سموم وعن هجير
يا رأية التوحيد فوق الساريات
ما داموا ال سعود لك فانتي بخير
من دونهم نرخص عمار غاليات
لو ما بقى منا سوى طفل صغير
ويخسون من عنا يبث الشايعات
أهل النوايا السود والعلم الفقير
الشاعر - المهدي بن تركي الرياحي