حلول اللغز

نشرنا في عدد الاسبوع الماضي لغزاً كتبه الزميل الشاعر ناصر المسيميري كان نصه:
بنت مدري ولد متحيرٍ فيها
ضاع دوره وصارت شبه معدومه
بدلوها بشي ما يحاليها
ووكلوا به وكيلٍ يجهل سلومه
واللغز كما يبدو فيه شيء من الصعوبة لكن قراء الجزيرة لايصعب عليهم أي شيء له علاقة بموروثنا الشعبي حيث جاءتنا مجموعة كبيرة من الحلول الصحيحة ننشرها حسب ترتيب وصولها:
مرحباً عد ما تذري ذواريها
بالذي في المثايل شاعت علومه
زين الأبيات بادعها وناقيها
ناصر خطته في الشعر مرسومه
لغزكم ذيك محماسة نسميها
وحين محماس بين الناس معلومة
سعد الكثيري
الحريق
***
أجمل تحية بعطر الورد نهديها
للشاعر اللي عجيب وتعجب اعلومه
ناصر ابيوته عجيبه في معانيها
لا شك عند أكثر العراف مفهومه
محامسة البن عندي محتفظ فيها
مع المعاميل تبقى دوم محشومة
صالح السبيل ابو بسام
بريده حي الروضه
***
بنت ولا ولد تظهر بساميها
ضيّعوها هل التقحيص والنومه
أوّل الناس ماهو مثل تاليها
كل ناسٍ لهم دورٍ ومعلومه
أقهوتنا نباحنا نسوّيها
وسط محماسه أو محماس مفهومه
محمد علي السالمي
رفحاء
***
ناصر صعاب المعاني دوم هاويها
يبحث عن الكايده ماتثني عزومه
وأفكاره النيره لنا الفخر فيها
دايم معانيه بالألغاز محكومه
وإن كان ياراعي القهوه تسويها
محماسة البن للحماس ملزومه
مفرح علي الحربي
بريده حي الصبيحيه
***
أجزل تحيه لناصر يوم نهديها
حنا نعزِّه وناخذ طيب اعلومه
ولا سمعت التراث وحلِّ طاريها
حَبِّيتِ صفحةُ لكلّ الناسِ مفهومه
محماسة تضبط القهوة وتسويها
وان قلت محماس عند البدوِ معلومه
علي رشيد الرشيد
رياض الخبراء
***
للي يحرر صحيفتنا وقاريها
أجمل تحيه عداد الكون ونجومه
وايضا تحيه لراع اللغز نهديها
وإجابة اللغز معروفه ومفهومه
محماسة البن عندي وافتخر فيها
يوم أنها عند بعض الناس معدومه
بدر زهران الشلاحي
بريده حي الشقه
***
لو بغاء يخفي الشاعر مواريها
بينات معالمها ومفهومه
قارنوابه مره وزرا يجاريها
ضيعت ماضي المحماس وعلومه
حمود بن جعيثن العطاوي
عفيف
***
محماسة البن ناصر جاب طاريها
ويومه نشدنا عن المحماس مالومه
البن له حمسه والبعض يخطيها
عنده اساليبها ماهي بمفهومه
وللي جهل حمسة القهوه يخليها
للي نظام القهاوي يفهم اسلومه
زهران عون الله المطيري
بريده
***
كان ناصر حلول اللغز مخفيها
كيف افك الرموز بدون معلومه
ذيك محماسة للبن تغليها
لكن الوقت عنها غيّر سلومه
نافع الحربي
الرياض
***
ناصر مزايا اسلوب الشعر حاويها
والحل محماسة الكيف مفهومه
نحمس بها بن فوق النار نصليها
واليوم فيها العرب ماهيب ملزومه
خليف الحربي
الرياض
***
التحيه لكم من قلب نهديها
يارفيف يجيب الغاز محكومه
بنتكم بيّنه وأكشف خوافيها
ذيك محماسةٍ للناس معلومه
صالح عبدالله الزرير
الرس