الصدى الأخير لقصيدة الحويفي

وصلتنا القصيدة السابعة التي تتضامن مع رأي الشاعر الكبير بدر بن عواد الحويفي عن الشعر الشعبي في صحافتنا واجهزة الاعلام الاخرى الذي طغى غثه على سمينه,.
ولأن القصيدة وصلت بعد الانتهاء من اعداد مادة الجمعة الماضية فقد كدنا ان نعتذر للشاعر مقعد العياضي,, لكن بدر الحويفي اتاح لنا الفرصة من خلال قصيدة جديدة كتبها شاكراً الشعراء الذين شاركوا بقصائدهم وخاتماً ذلك الحوار الثري.
وهذه اولا قصيدة الشاعر مقعد العياضي:
يا بدر شعر اليوم كثر اضطرابه
أحد يحوس الشعر وأحد ينقيه
به شعر ما يسوى جناح الذبابه
ليت المصنف ما تطرق قوافيه
الشعر فقد ونقد سير ركابه
كلٍ بمقدوره يسيس مباديه
طبه طبيبه من يجيد الاصابه
ومريضه اللي يجهلنه معانيه
كل على قده يفصل ثيابه
فيه المواهب تختلف من مناشيه
جواهره مثل المطر من سحابه
لهن عقيد تحتضهن مباديه
ماله حصانه تمنع اللي عثابه
ولا تستريب ابما تشوفه وتوحيه
كل مورى له بشعره ومابه
يخوض به وسط المجالس ويرويه
ماكل شاعر قدوة يقتدى به
ولا كل شاعر يعجبنك معانيه
ولا كل من يرمي يحكم الاصابه
وحده تصيب وباقي الرمي يخطيه
ولو كل شاعر يفهمه واعتنى به
ماصار للنقاد بالشعر توجيه
والناس مختلفة شجر وسط غابه
متخالف ذوقه ولونه ومافيه
وعوج العصي ما تنعدل لو تشابه
لو المطر يغمر شجرها ويسقيه
ولو قال لك من قال لك واشترى به
لا اقول كل في مزاجه إمّشيه
أحد يبيع الشعر وأحد شرى به
تفيهت به ناس لو ما تسويه
ليا صار ما للشعر ذوق حبابه
ومثايل تحمي مجاله وطاريه
ماله مزاج وكلمته مستعابه
رخيص هرجه ما يساوى بغاليه
هذا من اسبابه ومن سوء ادابه
يبحل طبيبه ما يعالج مشاكيه
تم الكلام وفيه رد الاجابه
وصلوا على المختار ما حل طاريه
مقعد بن محمد العياضي الحربي الرس
***
اما قصيدة الحويفي خاتمة هذا النقاش فيقول فيها:
يا مرحبا ونقول فرصة سعيدة
يوم المحرر حجتي ما طعنها
فتح لها بيبان صفحة جديدة
ما حطها بالمهملات وخزنها
ابياتي اللي سجلت بالجريدة
وردت على ناس عطوني ثمنها
وعن السؤال اللي بمبدا النشيدة
فكر وعبر صاحب الفكر عنها
وجاوب عليها كل طيب عقيدة
بابيات تيار الجهل ما حضنها
وكل تقدم للسؤال بقصيدة
وادولا برايه والمعاني وزنها
شعار ما قالوا بيوت زهيدة
قريحة الشعار قادوا ضعنها
افكارهم صارت لفكري شهيدة
ما تنكر الشعار لهجة وطنها
وانظار عقال العوارف بعيدة
لو ضاع جاهل والقريحة عجنها
مجد العرب شعر العوارف رصيده
ثبت مواقيف الرجال وضمنها
اشعارهم في كل منهج مفيدة
باللهجه اللي ما تغير لحنها
لهجة سلفنا من سنين عديدة
تعيش وغبار الجهل ما دفنها
عسى العواقب ياالنشامى حميدة
ونهاية الموضع فيها ومنها
الموجب ان الشعر صعب اتحديده
واخير ما للنفس راحة بدنها