أمشي على رأيي

قالوا مشيّب ما وصلت الثلاثين
الشيب في رأسك تزايد بروزه
وأقول شيبي من قبل عام عشرين
أخفيه مير اليوم بانت إحزوزه
صارعتنا الدنيا وذقت الأمرين
والوقت جر عني المرارة بكوزه
فوق المتون جبال همٍ من اسنين
ولا يمكن اتشوف المتون مهزوزه
وإن كان تستغرب صمودي لذلحين
هذا فضل ربي وكلٍ يروزه
لاجيت بأستسلم وشفت الشموتين
كلٍ يحد السيف وإيمد بوزه
وقّفت وقفات الشيوخ السلاطين
لو ضامري فيه الرماح مغروزه
لوراس مالي في العمر كيسة طحين
تقول (بيل جيتش) عطاني إكنوزه
لا عاش مخلوق رضى بقول مسكين
وألا رضى بنظرات عطف تهوزه
أمشي على رأيي وحسب القوانين
يوم الردي يمشي برغبة عجوزه
ما همني ياكون رب الثقلين
إراضاه عندي غايتي والمعوزه
ويهمني لأرضيت ربع عزيزين
لهم مكانة في الضمير إمحجوزه
وأهل الوفا والطيب عندي حشيمين
لو كانوا (بمصر وشمال العجوزة)
وإن كان ما تبنى العلاقة على الدين
يطيح مبناها وتسقط إرموزه