ما بالمعاصي وناسه

يا اللي تدور في المعاصي وناستك
عمر المعاصي ما تجيب الوناسه
في طاعة المعبود تلقى سعادتك
وليا عصيته ذقت هم وتعاسه
في الدين تلقى كل مطلوب حاجتك
ما هوب في مال كثير ورياسه
أنا أشهد أن الدين فخرك وعزتك
كان الفخر والعز تبغى لباسه
ارفع للمعالي مطلب الجود همتك
صرح المعالي ثبت جسور ساسه
رم للمعالي واصعد بكل قوتك
خل الطمان لعاشقين الدناسه
خل لولي العرش مقصود وجهتك
والمرجله ما هيب تدرس دراسه
ان كان ما حصلتها وقت شبتك
تصعب على الرجال لاشاب راسه
اجعل لمرقى نايف الجود نظرتك
الذيب ما ينظر لماطى مداسه
الناس تحكم شخصك بلفظ هرجتك
عس الكلام اللي تقوله عساسه
اعرف قدر ميزان تصنيف كلمتك
هي من ذهب والا دخلها نحاسه
لا تنطق الا هرجٍ يزيد هيبتك
لا طب سوقٍ فاق دره وماسه
واللي يعيبك دونه اقفل محطتك
لا تسقي العراف من مر كاسه
ان كان ما فاحت على العز دلتك
والا ترى دربك كثير عكاسه
لا تنعدم عند المناعير شيمتك
اسلك طريق الطيب واترك طفاسه
سحب المنايا وين ما كنت جايتك
لو حط من دونك متارس احراسه
يا الله يا مطلوب نرجيك رحمتك
لادق ناقور المنايا اجراسه
رجواي يا مولاي عفوك وجنتك
اغفر خطاء عبدٍ تزايد اعماسه