عسى الجنة مقره

في رثاء الزميل علي بن حمدان الشهري - رحمه الله -
لا والله صابك الحزن يادار
ومن مر جنبك فاض دمعه ومعذور
من يوم راح مدله الضيف والجار
صحيبي عسى من خطاياه مغفور
معروف أبو حمدان من طيب الأذكار
علي حمدان اللي له الطيب منشور
وافي مع الأصحاب ما هوب بوار
وصريح ما ينطق مسبه ولازور
ياقل جنسه بين وافين الأشبار
يالله عسى الجنة مقره مع الحور
دنيا كفى الله شرها تسقى الأمرار
وفي كل يوم من صلفها لها دور
عسى العزا ينزل على الناس الأخيار
بحسناك يا منزل تبارك مع الطور
واعزي اخوانه واعزي هل الدار
ياحيث في الباقين للأهل مذخور
دنياك هذي كل يوم لها اطوار
ما هيب تخدع غير من كان مغرور
ياما فنى فيها مسالم وجبار
الرابح اللي راح بالخير مذكور
على الحيا يسقي وهتان الأمطار
قبر ترابه طيب الذكر مقبور