ريع الهيام

ياللي نشدتي عن صفاتي كان اعرت بها اهتمام
قدام أبين لك ترى ما فيه شخص بلا خلل
لكن نويت ابختصر لك وأول حروفي سلام
من بعدها فالحال مستورة ولا منها خجل
ما هوب أنا اللي والدته أمه على ريش النعام
أنا بدويٍ والدته أمه على قمة جبل
من عادتي متسامح ولا اطيع مقطوع الرحام
لو جتني الشينه ترى ماني على الشينه عجل
وليا زعلت ووصلت الدعوى ليا مس الحزام
الله يجيرك تقدر تقولين عاقل وانهبل
أعشق عبارات الوكاد أحسها رمز التمام
وأخاف أقرر لا صدمت بربما أو محتمل
وأنا نظامي كل شيء له بتقديري مقام
أحاول اليني مشيت امشي على خير السبل
ما هو بدايم يسلم اللي عادته عكس النظام
لا بد ما تعثر قدم تعودت درب الزلل
شاعر كتبت الشعر من صغري وهذبت الكلام
رسمت حرف الحكمة بشعري قبل حرف الغزل
وأنا ليا مني عشقت أنزل على ريع الهيام
ومن لا درى ويش الهيام يشوف فعله بالإبل
شعيل لا هايم لو أنه كان مردوم السنام
من بعد مردوم السنام اللي على ظهره هزل
يحت وبره من رداه تقول مرجومة عظام
واليا وقف قام ايتراقل كن في ظهره حمل
هذا ترى فعل الغرام ان ما تعرفين الغرام
لا تصدقين اللي يقول إن الهوى طعمه عسل
وهذي صفاتي وادرسيها زين قبل الانضمام
ترى بعد عقد الحبل ما هو سهل نقض الحبل
اما اقبليها واقبلي معها تحية واحترام
ولا الحقي غيرك ترى قبلك كثير اللي رحل