7 الآلاف نقطة من طرحها واستفاد؟

أبسأل الهيئة عساها في جوابي تستطيع

يا لله يا قدوس يا رحمن يا حق وبديع
يا مؤمنٍ ومهيمنٍ يا مبصرٍ حال العباد
يا رافعٍ سبع السموات العظام ويا سميع
يا سامعٍ دبة سواد النمل في حلكة سواد
يا لله ترحم حالنا وتستر على حال الجميع
ترأف بحال أموالنا طاحت وصايبها كساد
دحدر مؤشر سوقنا من عالي الشان الرفيع
جلمود صخرٍ منحدر للقاع مامنه فواد
في (صالة الأسهم) كثير اللي غدا جسمه صريع
من (جني الأرباح) انجنى في صحته بهبوط حاد
تذرف دموع الأرملة في حضنها طفلٍ رضيع
وأموالها خضر المحاصيل أجدبت جاها جراد
وآهات.. يا حلم الشباب اللي يبي حاضر ينيع
وأدت أماني همته ما فارقت حد المهاد
وهذاك طلق حرمته بسبة أموالٍ تضيع
والسوق دمر عيشته وأعلن على شخصه حداد
وهذاك عودٍ في شبابه يزرع ورود الربيع
ول!! يا سوقٍ تعس ما يرحمه وقت الحصاد
والناس تاهت في خطاويها من الفعل المُريع
كل يوم راس أموالها تنقص ولا هي بزدياد
أحدٍ يقول (الطفرة راحت) والنصيحه بيع.. بيع
وأحدٍ يقول (أصبر ترفق!!) بكره.. بكره الارتداد
وأحدٍ يقول المشكله يا ناس في (بيع القطيع)
وأحدٍ يقول المشكله في (هيئةٍ) تمشي عناد
وأحدٍ يحلف المشكله سبة هواميرٍ تبيع
بالنسبه الدُّنيا أوامر بيعهم.. تخويف جاد
وأحدٍ يقول المشكله من شائعة كانت تشيع
وأحدٍ يقول إن سوقنا صابه من الطيحه فساد
حاولت أحلل هالمؤشر ليه يهوي كالصقيع
للأسف!! مافادني لا (بلينجر) ولا (مكاد)
المشكله أكبر من التهوين بلسان المذيع
المشكله ما هي تحل معادله من سين صاد
ما دام قايدنا رفيع الشان والخير الوسيع
عبدالله اللي يعطي الخيرات بالعلم الوكاد
وما دام ننعم بالأمن وإبدارنا درعٍ منيع
وما دام ربي منعمٍ بالخير وبقو اقتصاد
أبسأل الهيئة عساها في جوابي تستطيع
سبعة الآلاف نقطه من طرحها واستفاد؟!