التحليل «المعاكس»!

أعزائي مقدمي البرامج الحوارية حقت الرياضة.. تبونا نصدق مثلا أن هالهواش كله صدق؟ طلع المنتخب من هنا وما درينا الا هالقنوات ما خلت لها لاعب معتزل أو لاعب احتياط الا وجمعتهم وقالت لهم يلا ادهروا يالربع.. عندكم ثلاث ساعات بث.. والله الله بالمناقشات والزعيق «ما اقصد أي فريق لاحد يستقعد» عشان نقول بكرة ان قناتنا اكثر قناة فيها اثارة!
الواضح عندي ان الموضوع فيه إن، سالفة انك تجيب اثنين وتفهمهم بطريقة ما انهم لازم يطيحون تقطيع وذب في بعض على طريقة خوينا فيصل القاسم، ويجونك الشباب متحمسين على هالأساس وتلاقي المذيع ينبسط عليهم كلما «قبت» السالفة بينهم اكثر، ولا يفكر يهديهم بالعكس وده يقول لهم «عطونا من هالمانشيتات القوية ترا الدعوة بيع كلام، والزبدة نبي نشهر القناة في اليوتيوب!»
تجي انت يا مشاهد يا لطيف يقال لك تبي تسمع تحليل فني وما تشوف الا واحد يقول للثاني «فرحان لي بدفتر ابو اربعين اللي في يدك» وهذاك يرد عليه «من زين جاكيتك هذا ابو وجهين»، أجل البرنامج توه بادي ويجيك اول متحدث يخش بعين واحد جالس في أمان الله ويقول له «كلامك اللي قلته فيه حقد على اللاعب وتحامل على الفريق».. يرد عليه «طيب انا ما تكلمت.. اصلا انا المخرج!» ويجيه الرد من المحلل المتحمس «لو سمحت لا تقاطعني.. أنا ما قاطعتك!»