اعمل الخير

خل حالي لحالي وأنت خلك بحالك
دام مالي قبول ولا أنت راضي عليه
المقدر يكون بدون يخطر ببالك
وأنت له ما سعيت ولا اعتقدت بمجيه
ماشي الكون ماشي ما أنت فيها لحالك
بس يا زين عز النفس ما دام حيه
خل عنك المنافق لو تكلم بخالك
وارفع النفس عن نقل العلوم الرديه
من يقدرك عزه ثم حطه بجالك
دام نفسه عزيزه ما بها سوء نيه
الجهاله عدو النفس فيها المهالك
بس بالصبر تغلب والتأني شويه
عمك اللي معك وليا تعثرت شالك
وخالك اللي تخلى ما يبالك وصيه
كل شيئاً تباه بتاخذه من حلالك
والردى بالمنا مشغول ميه بميه
الردى يا عسا ما فاله اليوم فالك
يسهر الليل كله ثم نام ضحويه
حذر الشاطرين ومنه حذر عيالك
والحذر تقرب الاجرب وتقرب خويه
ثم والله ما يبراء الجرب من قبالك
الجرب علة لو صاب عله قويه
ينتشر في العروق وينتشر في المسالك
ما فلح اللي مصاب بعله باطنيه
لا تخاوي المريض ولا تمد بشمالك
واحفظ النفس دائم في سلام وتحيه
الجواب أنت تعرف يوم تكتب سوالك
بين الفرق في الاسلام والجاهلية
خل عنك النجوم وصل وأمسك جبالك
القناعه تراها كنز ما فيه زيه
لو تبي تنصح المجنون تتعب رحالك
بس خلك بعيد وسايسه من شويه
اعمل الخير دائم دام تقدر سبالك
والبواقي على الله بينه والخفيه
لا تلوم الضعيف اللي لظرفه عنالك
الوزاء جرحا له وسط هالمهمهيه
الظروف الرديه تودع القرم حالك
شاحب الوجه قاتم نظرته جانبيه