يشهد له التاريخ

جانا خبر والجوف كنه على نار
علمٍ لفانا كسّر القلب تكسير
جانا خبر عن راعي الطيب والكار
موت المليك اللي خذته المقادير
شيخ فعوله ما تبي علم وأخبار
له في ثنايا المجد عز وتقدير
يشهد له التاريخ في طي الأسطار
فعله وجهده فاق كل المعايير
مرحوم يا نجم سطع فوق الأقمار
نجم بكت فرقاه كل الجماهير
يا الله عسى له منزل عند الأبرار
في جنة الفردوس مع زمرة الخير
الله أمرنا بالصبر عند الأقدار
لا حلت الآجال ما فيه تأخير
ما قدر الله كان يفعل ويختار
مالك سوى المكتوب ما غيره يصير
وأنا أحمد الله في ذرى حكم الأخيار
اللابة اللي تاخذ الحق وتشير
لا غاب نجم يثبت العلم بالدار
يظهر لنا من ياخذ الحكم ويسير
عبدالله اللي ذاع صيته بالأقطار
ليثٍ كريم سخر الحق تسخير
يا خادم البيتين يا وافي الأشبار
حنا جنودك باليسر والمعاسير
لك بيعة بأعناقنا سر وجهار
علم وكاد ما حصل فيه تزوير
وأيضاً ولي العهد سلطان الأحرار
اللي يمينه بالعطا وصلت الغير
ريف الضعيف اللي من الضيق محتار
شهمٍ شجاع طوّر الجيش تطوير
يا خادم البيتين يالوالد البار
أنتم هل الطولات يابن المشاهير
يابن الملوك اللي حموا هيبة الدار
أهل السيوف المرهفات البواتير
آل السعود اللي يدوسون الأخطار
مثل الأسود الضاريات الهزابير
ستر العذارى يوم الأفكار تحتار
قوم تهد الضد لوهم طوابير
أنتا من اللي ذللوا صعب الأوعار
لين أبدل الله عسرها بالتياسير
يوم الجزيرة بين غازي وغدار
وابليس بالفتنة بنا له مقاصير
قيض لها من لابة الجود مغوار
امحمد بن سعود ليث المناعير
اللي حما الدعوة من الشر وأشرار
لين استقام الدين من غير تقصير
قامت على حكم الشريعة والأذكار
وأقفت غياهيب الدجى والمناكير
واستامنت فيها السبل بين الأمصار
وأصبح ردي الحيل يارد على البير
أنتم مفاخركم مثل زرق الأبحار
وأنتم من اللي سطر المجد تسطير
هذي خفايا خاطري جت بالأشعار
هذي مشاعر واحد من هل سدير
والخاتمة صلوا على راعي الغار
اللي بعث للخلق نور وتذكير