المملكة

الله ما أحلى السعودية وما أغلاها
والله ما مثلها في كل الأوطاني
أرضٍ غلاها شربته شرب مع ماها
مخالطٍ حبها دمي شرياني
لا غبت عنها يحن القلب يبغاها
النفس ضاقت وقام الهم يبراني
من دونها نقحم الدعوى إلى أقصاها
ونرخص لها العمر في حزات الأكواني
وبالروح والمال والأولاد نفداها
ولا نطيع فيها كلام فلان وفلاني
وليا دعتنا لها الأرواح سقناها
نارد حياض المنايا ورد ضمياني
ما جاتنا بثورة الفاتح وشرواها
ولا قادها حزب بعثيه وعلماني
وحد ثراها معزي لين صفاها
بالدين والسيف والحكمة والإيماني
ثم أذعنتله قبايل نجد وأرضاها
وعقب العدوات صارو مثل الأخواني
ولا الجزيرة من أقصاها إلى أدناها
ولا عاد ترضى بغيره حاكمٍ ثاني
من بحر جدة إلى الدمام وأحساها
ومن الحدود الشمالية لنجراني
أرض الوفاء يا عساء الرحمن يرعاها
في ظل فهد وعبدالله وسلطاني
هي قبلة المسلمين وهي مأواها
منهاجها الشرع والدستور قرآني
من ضامه الوقت يزبنها وينصاها
يلقى بها فيض جود وخير وأماني
الله حسبي على ناس تبلاها
ناس تثير الفتن وتشيل الأضغاني
الشلة اللي دعاها إبليس وأغواها
عدوان لله وللإسلام عدواني
تدعي للإصلاح والإفساد مبداها
شتان بين الهدف والقصد شتاني
نعرف مرامي مقاصدها ومغزاها
الشر والحقد من منطوقها باني
يخسا الفقيه وكلابه ما يتهقواها
نقول قول عليه الفعل برهاني
المملكة شامخة ما أنته بوياها
حامينا آل السعود أبنا كحيلاني
حكامنا هم حماة الدار وحجاها
معروفة أفعالهم من ماضي الأزماني
وألا أنته فعولك الشينة عرفناها
الكذب والزيف لك مبداء وعنواني
وعن لحيتك تكرم الأجواد ولحاها
أهل الجزيرة هل النخوة والإيماني
له لحيتن بالقشر والشر حناها
سيماه مسلم وقلبه قلب نصراني
من عق داره وحاربها وعاداها
الله يجعله يطوى وسط الأكفاني
ويا لله تقلع هل الفتنة وتمحاها
وتحفظ لنا المملكة يا عالي الشاني
هذي مشاعر سعوديٍ تبناها
مشاعرة صادقة من قلب ولساني
وتمت وصلوا على خير الملاء طاها
ما لاح برق الحياء في غر الأمزاني