هيضه وصفٍ لفواز قرناس لقاه

مجاراة لقصيدة الشاعر فواز بن فيحان العتيبي المنشورة بالعدد رقم 11789 وتاريخ 26-11-1425ه
مع غروب الشمس من بعد مالغربي نقر
اصغت اسماعي لما شد في الانتباه
وفاق فكري بعدما اصغى لمنظومة فكر
حركت هاجوس صدر غريق في هواه
قام يسبح في بحور الخيال ويعتبر
هيظة وصف لفواز قرناس لقاه
ودي ادخل معه بالوصف في بعض الصور
وصف من وده ملكني وخفاقي زواه
صرت احبه حب من مسني منها سحر
بالعيون البابليه ومنطوق الشفاه
طير هجرة عابر من بعيدات الدير
عابر من بر فارس مفارس في ثراه
في حدود المملكة طب في حومة ظهر
وبعد خمسة أيام شافوه مادلوا مساه
في شطوط مجيرمة والهلال اصبح قمر
كل من شافوه قالوا فلاشفنا كماه
وبعدها بايام بدري مع طلوع السفر
جاك سارح مثل عادته يبحث عن غداه
جاك سارح يوم حظه تدهور وانعثر
وبعد ماضف الحمامة نقل برداه داه
جابته دورة دواليب حظه والقدر
وارتمى بين الطواريح يوم الله رماه
حظ من ناشه زمانة بمخلاب الفقر
يوم لوح بالعمامه وضفه في يداه
وحس في نفسه بعد طرحته بعض الفخر
لو تبي تزهمة يا هيه ما قاللك هاه
افدع قرناس توه صغير فالعمر
في سوا ملموم في عين من داره وجاه
بارزة زوريتة عكسها مهدف ظهر
روز وزنة لا نقلته على كفك رزاه
فيه عيب مسبقة ما يشاف من الهجر
والخبايب فوق اراضية جت مثل العظاه
وكن عينة للموصف سنا واهج جمر
قاطب وجهه مثل حد مصقول الشباه
منكبة يشبة لكرنوف مطلعة التمر
والمناخر فج والبوز جل الي عطاه
وعاتقة بالضبط ما قل طولة عن فتر
وان لمسته ملمسه يابس مثل الصفاة
ان قفيتة لون ريشة مثل لون التبر
صبته وحده مصفى ولا غيرة صفاه
وان نطحته لون صدره جليد منهمر
نازل في طرق عرق بملبوسة كساه
والشليل ابيض بياضة مرصع بالدرر
وابيض راسه بياض نظر عيني سباه
غير وصفة فعله الي ينومس من صقر
لابلج عنه يتطلع على راسي النباه
ثم تمسس يوم دقق وحقق ثم سمر
وتل سبقة طلعه بعيد يوم انه نواه
ارتفع والجيب من جرف ينزل في وعر
والدريول في هوا الطير جوب مع سماه
وصب عمره فوق خرب يكوبر ويهدر
من سنة نازل غشيم ترثع في شواه
عود أزرق ريش طايش وفي راسه سطر
مادرى انه طاح في اللي يبي يلعن ثواه
يوم طقه ثوع الريش مع دربه شهر
وانحدر كنه شهاب على روس العصاه
وقوظ الحفان يبغى الطقيط عن الخطر
مار لحقة في دقايق وخيب له رجاه
ماتهم الناس سعره ولو زاد السعر
البلا كله يا فواز من يبحث خفاه
رحت قنص خمسة أيام من فوق الشهر
والمولع مثلنا زاد في الطرقة شقاه
اتطلع في السماء واتعين للأثر
ما لقيت من الأثر غير جرة ضلف شاه
متعبين اركابنا بالحمول وبالسفر
باحثين عن طراه وملذات الحياة
ويرجع الصقار من طرقتة ضايق صدر
وكن رجلينة توطى على شوك السحاه
ان طرش ما صادف القفر غير من الدهر
وان رجع شوف المدينة على عينه قذاه