شط الحياه

البحر بالموج هايج وانت في بطن السفينه
لا غرق نصف السفينه وش بقالك ف الحياه
لو عرفت ان الركاده والعقل بالناس زينه
ما تورطت بمشاكل حلها حظ النجاه
ما ندمت إلا بعد ما وسدك فعلك غبينه
وانهدم حلم بنيته فوق رأس اللي بناه
لو تعلمت الاراده والقناعة والسكينة
واستشرت العاقل اللي ينصحك باللي لقاه
وابتديت الخطوة اللي مقتنع فيها متينه
للطموح وللأماني درب كل قد مشاه
لا تقول انك حزين ودنيتك صارت حزينه
قدر المكتوب ربك والله اعلم في عطاه
اطلب الله في صلاتك وابتعد عن كل شينه
كمل المشوار كنك ما عثرت بمبتداه
بالأمل عيش بحياتك واطلق النفس السجينه
من مشا في درب يلقا ما بغاه بمنتهاه
لا تردد في مكانك تحسب هموم دفينه
كل ما فات وتعدا وش تبي به وش وراه
ما مضالك من تجارب خلها عندك خزينه
الخطا درب الصواب وكل يحدد خطاه
لو تذكرت بزمانك ما جرا لك في سنينه
ما ندمت وقلت حظي من عرفته في رداه
لا تقول الحظ عاثر وانت في ذيك السفينه
قول انا كيف اتعلم واسبح لشط الحياه