حلوم ليل

البارحة ضاق بي صدري.. وجا فالقلب هوجاس
خطر على القلب من كثر الهواجيس تغذي به
اقوم واقعد وكني في ظلام الليل حراس
واسج والعين عافت نومها ما تهتني به
واترجم الهم من قلبي على حبرٍ وقرطاس
وادلة النفس والا الوقت ما ندري بغيبه
لاكني اشتال همي لاجل ما تدري به الناس
ويعلم به الواحد اللي كل خلقه تلتجي به
وهموم قلبي غدت منها العروق الخضر يبّاس
يبس الورق في غصونه حزة الصيف ولهيبه
كله سبب من بناله فالحشا بنيٍ على ساس
بعده مصيبه وقربه ياهل النخوه مصيبه
ان راح عني بعيد يصيبني من بعده الباس
وان صار عندي قريب الزين همي مادري به
حساس بالحيل والا صاحبي ما عنده احساس
وصحيح راع الوفا ما يذبحه ياكود طيبه
واقول يا قلب دربٍ لك به الشينه والافلاس
جنب عنه واتركه بالله قل لي وش نبي به
لكن ما للهوى والحب بالاجواد مقياس
طيفه تروّح به حلومي مع الليل وتجيبه
واصبر ولو كان طعم الصبر مر اقول لا باس
ما ودي انه يذيع السر والناس تحكي به