وزير الدولة اللي باجتهاده حقق آماله

سلامي للأمير اللي سنام المجد منزاله
عليه اهدي تحيات من الأعماق قايلها
على عبدالعزيز اللي علوم الطيب تثناله
مواقفه النبيله ما لها وصفٍ يماثلها
تحياتٍ من الأعماق تثناله وتهدى له
يعيش وعاشت اسنينه عسى ربي يطولها
امير معجزات الطيب تسند له وتروى له
وله وقفات بالشدات ما شيٍ يعادلها
سطع نجمه على سطح الكواكب بالفضاء الحاله
عزيز وحط نفسه بالمكان اللي يليق الها
وزير الدولة اللي باجتهاده حقق آماله
ونظراته بعيده بالسياسة لا حدود الها
ولد فهد الفهود الله لا يقطع له اسلاله
سلاطين الملوك الله لا يقطع سلايلها
رفع شعبه على سطح الثرياء والجهل زاله
حياض المعرفة والعلم وردنا مناهلها
نهض نجد العزيز وحوله من حال لحاله
بنهضه شاملة متكاملة باحدث وسايلها
فهد لا قال قولٍ يسبقن اقواله أفعاله
لا عدت مشاهير العرب لا فهدِ أولها
هذا ابوفيصل اللي ما يجن البيض بأمثاله
تلوذ به الرجال وظله الظافي يظللها
سياسياً حكيمٍ ما يبي تعليم وادلاله
دليلٍ للعوارف كل ما ضاعت دلايلها
اله صوله واله جوله وله علمٍ ليا قاله
يدير افكار صناع السياسة في محافلها
شجاعٍ باللقاء ما تقرب الشجعان فنجاله
تخضعله سلاطين شواربها تفتلها
وسامين الشجاعة والصخا ما تصلح إلا له
كسبها حض ابو فيصل وغيره ما يحصلها
عدت الأبطال مع دربه ولا أحداً وصل موصاله
على غيره يزيد وفعله يغطي فعايلها
فهد درع البلاد اللي عليها يضفي ظلاله
جمايل خادم البيتين ما تحصى فضايلها
واعود لمدح ابوتركي عساها تكثر امثاله
نوادر كل طيبٍ فيه ما وجوده خصايلها
أميراً ناجبه بالطيب أبوه وعمه وخاله
عمالقة الرجال اللي رفيعات منازلها
حفظك الله يا أميراً رجح بالطيب مكياله
صعيبات المراجل كل ما تبدي بديتلها
يعيش النادر اللي فالشدايد ينطح القاله
لعل اعداه دايم مالها حظ يقوم الها
بيوت الشعر لا نضدت كما اللؤلؤ تعداله
عسى يا سيدي مني بصدر رحب تقبلها
هذا والمعذره من نقص قافٍ ما انتبهنا له
لا صار النقص منا طيبك الوافي يكملها
محمد بن طماح بن سعد المجمعي السبيعي