أمر الولي

قصيدة في رثاء الفقيد سعود بن صياح العنزي رحمه الله
عديت في رجمٍ رقى راسه الطير
وجلست في راسه وحيدٍ لحالي
رجمٍ يشادي مرقبه راس أبا مغير
روس الهضاب النايفات الطوالي
سويت مع راسه طلوع ومحادير
من كثر ما ارقى وانحدر باعتجالي
وهموم قلبي وردات ومصادير
عز الله انه خبث الهم بالي
وناراً بصدري ولعه راعي الكير
يحرق سناها بالضمير اشتعالي
ودموع عيني فوق خدي نواثير
تشدا هماليل المطر من خيالي
يا سعود بن صياح نذكرك بالخير
وفي كل لحظاتٍ تصور ابالي
لولاي اسلي خاطري بالمشاوير
لا اصير مثل اللي من العقل خالي
عليك ياللي ماتهاب المخاسير
ذبايحك للضيف حيلٍ إجلالي
مرحوم ياللي ماتعرف المعاذير
مرحوم يا راع الفعول الجزالي
تفرح ليا منه لفوك المسايير
في مجلسك تلقا عذي الدلالي
ينصاك من ضاقت عليه المعابير
انا اشهد انك من خيار الرجالي
عند النشاما لك معزه وتقدير
ويحسب حسابك يابعيد المدالي
امر الولي مافيه صرفه وتدبير
وبأمره يصرفنا على كل حالي
يالله يالمعبود وال المقادير
وتجعل مقره في نعيم الظلالي