`دمعة حزن

تحت الثرى والروح لبت نداها
شي كتبه الله وبقضاه راضين
كل من عليها فان والله ولاها
ماكنها عاشت لنا ايام وسنين
راحت وليت الموت مر وخلاها
طعم الحياة امرار من غير غالين
هي العزيزه وما يوصف غلاها
بنتي وبنت امي وغيري كثيرين
هي بنتهم والكل وده فداها
يالله عساك بجنة الخلد تمسين
ويرفعك ربي مايروعك ثراها
ما قد نزلت للقبر قبل هالحين
ليت منهو بين الضلوع احتواها
والله يالولا الخوف بمخالف الدين
لأعيش عند القبر واحرس ثراها
ادعي لها بالصوت مع دمعة العين
ودعواي تالي الليل باعلا سماها
يا الله ان تثقل لها كل الموازين
آمين يارحمن ولا تخيب رجاها
صامت وصلت ودعت قبل عامين
يالله ان تقبل صومها مع دعاها
يارب يا قابل دعا المصلين
حقق لها الجنة واجمعنا معاها
في هجعة العربان نسجد وداعين
في جنة الفردوس يحقق لقانا
من لي عقب فرقاك وانتي تعرفين
روحي معك راحت وباقي رجاها
لابد مانلحقك بنتي بعد حين
وبصبر إلين النفس تلحق مناها
والدها محمد بن عبدالعزيز الجميعه