طويت صفحاتك

صاحت جروحي وأشبكت صرخة الليل
وجسمي نزيفه مختلط مع عظامه
مشلوله أطرافي وحالي غرابيل
يا جارحي ما شفت فيني علامة؟
هذا صدى جرحك بنزف المناديل
ومعه اتفق صوت الشقى والندامه
شمعة وذبتي وانتهت كذبة إبريل
والحلم قفى وانظري بي حطامه
أحلى الأماني في خفوقي مقاتيل
على كراسي الجرح ذكرى غرامه
كنت أعشقك عشق بدوي ركبته خيل
يرحل وينزل والمشاعر خيامه
كنتي سوالف شاعرك بالتعاليل
اسمك سكن كل الحروف بكلامه
كنت أجرعك من دلتي بالفناجيل
قهوة وهيل وزعفران اليمامه
كنتي وكنتي فعل ماضي من القيل
كنتي لي المهرة وعمري لجامه
واليوم رحلتلك من الروح ترحيل
وانزاح عن قلبي سحايب غمامه
يقولها قلبٍ دموعه هماليل
وتقولها عينٍ جفت عن منامه
ما هو بأنا من تغلبه عاصفة ويل
أنا الشديد بعزتي والكرامه
ما أرضى على نفسي تذوق البهاذيل
أرضى الرجوله والكرم والشهامه
دامي ولد عودٍ ذخر للرجاجيل
ما أخضع لمثلك وآخر العمر خامه
لفي من المغرب الى شاطي النيل
والشام والبصرة ونجد وتهامة
روحي وأنا همومي عليه مثاقيل
مثل الجبل راسي شموخه وسامه
واقسم بربي منزل الطور والفيل
طويت صفحاتك وهذي ختامه
حان الرحيل ولا من اليوم تأجيل
وكلاً يشد لديرته بالسلامه