بعد الصيف

الصيف قفي وطلعة نجمة سهيل
وانا اتحرى غايب ما بعد رد
من فرقته هلت دموعي هماليل
وصارت وسوم بينات على الخد
أسهر على شانه واجر المواويل
لعيون ملهوف الحشا واتوجد
الصاحب اللي كمل الزين تكميل
مثل القمر بين البشر صافي الخد
والعين حوراء والشعر كنه الليل
ومن بد كل الخلق ما شفت له ند
ادرى هواه عن العباد المهابيل
ناس مع اهل الطيب ما جالها يد
اهل الحكي نقالة القال والقيل
اللي مع العربان ما تحفظ السد
لعيونه الثنتين ما رضى البهاذيل
لكن فراقه يودع السد ينبد
من يوم سافر ما لفى له مراسيل
وانا اعرفه وافي ولا يقبل الصد
لكن كذا الغربة هجوس وغرابيل
عسى وليفي باثرها ما تنكد
وليا طرى طاريه جبت المعاميل
وشبيت لي ناراً سناها توقد
وسويت من كيف النشامى الحلاحيل
اللي عزايمها على الضيم تشتد
دله وصافيها اشقر البن والهيل
فنجالها يشفي جروحي ليا مد
ومن عقبها زين اللحن والتماثيل
أغلى من الياقوت واحلى من الشهد
ما غير أسلي خاطري بالتعاليل
والا هموم القلب دايم توافد
واصبر تحت رجوى الليال المقابيل
عسى بها جمعي الحبايب وتسعد
اما رجع خلي بعد طلعة سهيل
والا على روحي حبيبي تشهّد
حمدان مسعود الرقاص