طبعك عنيد

وأنا أدري إن الود ما هو بكيفه
لكن أقول أخطيت يا القلب الأسناع
لا تنقل هموم الغرام الكليفه
أبغاه يرجع مير ذا القلب مولاع
يشقيه نسناس الهبوب الخفيفه
أشري قلوب الناس والوقت بياع
قلبي يغره نصب وقتي وزيفه
ليلى نكد وهموم والخلق هجاع
يوم اهتنوا بالنوم جفني يعيفه
بسباب من زادت على القلب الاوجاع
تسبي فؤادي بالعلوم الطريفه
يا عنق ريم له مرابي ومرتاع
في خبة بين الطعوس الكثيفه
أوجس من النسناس خيفات ثم فاع
حتى الهوى الذاري يذيره وحيفه
لك بالحشا منزال يا زين الاطباع
لو منزلك غرب الوطن في مصيفه
طبعك عنيد وصرت للوصل قطاع
واخطيت يا بستان قلبي وريفه
يا من ملك ما بين محني الأضلاع
جرحك بقلبي ما توقف نزيفه
فكرت بك واخذ بي الفكر مذواع
ولا فقت غير الدمع يذرف ذريفه
هذاه وضعي كان تخفاك الأوضاع
ويا كثر ما بين الضلوع النحيفه
سلمان المغيّري/ عفيف