أنا عنيد الراس ماني بخضاع

منكم تراني بالقليل قنوعي
لا والذي صورك يازين الاطباع
غير النظر بالعين مالي طموعي
شوف الجبين اللي مع الليل لماع
كنه يولع وسط جسمه شموعي
وشوف الرموش اللي لهنه تمرياع
لاسلهمت بالعين تقتل جموعي
شوفك شفا للقلب من كل الاوجاع
وبعدك لهايب بالضماير تلوعي
حبك لجا في القلب من بين الاضلاع
صكيت من دونه محاني ضلوعي
لا معطي حبك ولاني ببياع
وصميت عن كل العواذل سموعي
ياما سهرت الليل والناس هجاع
وياما على شانك تنثر دموعي
اغليك واثرك يا اريش العين قطاع
هوليش طبعك يا الحبيّب قطوعي
انا عنيد الراس ماني بخضاع
الا لرب الكون وحده خضوعي
حاولت اسانع لك على كل الاسناع
عيا سنعكم لا يوافق سنوعي
اقرب علي احيان من عض الاصباع
وابعد علي احيان من حب كوعي
فيحان المويهي - عفيف