هيام

نايف المطيري

أنا أشهد أني هايم في هذي الدنيا هيام
الله ولا قلب ٍ تعلق بالدروب الغاويه
نسعى ورى هذا الحطام وخابرين أنه حطام
يعني نعرف الهاوية ونروح يم الهاويه
كم ليلةٍ مرت ولا ذقنا بها حلو المنام
كله علشان الهموم السارحة والضاويه
دنيا العجايب والغرايب كم تغر من الانام
بين العقول الصاحية وإلا العقول الخاويه
اللي يعاكس سيرها واللي يزايمها زيام
واللي على عزمه مشى واللي جلس بالزاويه
احد يطيح وينثبر واحدن ليا من طاح قام
واحد يدمدمها كذا ولا كذا متساويه
وانا ليا حدتني الأيام شديت الحزام
ولا على ما قيل قلدت الذياب العاويه
اللي تجر الصوت بأسباب القهر والانهزام
حتى تقاوت واقتوت لو كان ما هي قاويه
وإلا صدحت الصوت لأصحابن رفيعين المقام
اللي على درب الوفا والمرجلة متخاويه
بيض النوايا طيبين الفال عذبين الكلام
يجلون هم الصاحب اللي صار همه طاويه
ويالله أنا طالبك توفيقك وتحقيق المرام
وتكفيني شرور القلوب القاصدة والناويه
حتى لو أني هايم في هذي الدنيا هيام
محيد عن مبداي بأسباب الدروب الغاويه