متى بتعود

فهد المساعد الشاعر المثقل بالشعر والحب والعاطفة ونص من لون آخر وشكل آخر وطعم آخر.. نص حمل مشاعر جياشة من الحب في رثاء خاله الفقيد الراحل الشيخ حمود بن دخيل بن عساف السبيعي -رحمه الله:
على أني قد بكيت أبوي من عقدين مدري زود
إلى أني ما شعرت بفقده إلا من بعد فرقاك
إنا وان كنت أنادي لك يا خالي .. أنت أبوي حمود
وداعا والدي خالي رفيقي ..يا كثر ما انعاك
يعزوني على فقدك وآنا آشك انك المفقود
ولاودي أصدقهم بفقدك وافقد الإدرك
وراك تغيب، توه ما انتهى حكيي، متى بتعود؟!
أدور في وجيه الناس عنك وما عرفت القاك
بقى في الصدر لك عندي سواليف وثناء مردود
وبقى لك دين في رقبتي ولا أدري اليوم كيف أجزاك
عسى الله يجزي عظامك بروض بارد ممدود
وعسى اللي جاي تفرح به وتسلى به عن اللي جاك
أنا يا خال ما أعزي خوالي مكثرين الجود
ولا أعزي عيالك واطيب ربوعك وذاك وذاك
أعزي فيك ضيفان وتراحيب ومكاسر عود
واعزي سكة المسجد ومجلس بيتك ومركاك
واعزي في صدى صوتك وتوديهك خيار الذود
واعزي كل من صافح على مر الزمن يمناك
فهد المساعد