رحل سلطان

صباح السبت نوره غير مدري ما شرق له نور
على شبه الجزيره نوّخ اركابه بعلمٍ شين
نشا غيم الحزن وامطر وسال وفاض منه صدور
غمر كل القلوب ولا سلم من دمع حزنه عين
وتباشر به ثرى أرضٍ كل ما شرف عليها قبور
تباهى باللحود اللي سكن فيها رجال الدين
فقدنا اللي دخل بقلوبنا حبه وحنا بزور
وكبر معنى غلاه وزاد قدره بالموده لين
رحل وانا على شوفه نعد امن الليال شهور
وذبل ورد اللقاء بكفوفنا ما بين لبن وطين
رحل سلطان بن عبدالعزيز الشامخ المشهور
بفعل الخير والاحسان للقاصين والدانين
رحل بحر العطا اللي لا عطى يعطي بدون قصور
رحل من مدته ما طالها الموتا ولا الحيين
رحل مجد العروبه سيفها لا والله إلاّ سور
على الاسلام سلطان المكارم مثل سور الصين
رحل رمز الوفا اللي خلّد التاريخ فيه سطور
وبقى عايش بوسط قلوب شعبٍ بالولا وافين
عسى قبره رياض وجعل ذنبه والخطا مغفور
ولعله في جنان الخلد ينعم بين حور العين
وعسى الله يبقِي اخوانه هل العوجاء طوال شبور
وينصر شعب اخو نوره ويشفي خادم البيتين
ظافر سعيد السهلي