حلول اللغز

نشرنا في عدد الأسبوع الماضي لغزاً كتبه الشاعر هندي بن نابت الغياثات الدوسري من محافظة الأفلاج وكان نصه:
يا ويش رجل.. يودي العلم ويجيب
أصم أبكم كود بعض الاشارات
يا كل طعامه بانتظام وترتيب
ويوصل بعيد الدار في ظرف لحظات
***
وقد وصلتنا عشرات الحلول كعادة قراء «الجزيرة» بالتفاعل مع كل ما يطرح على صفحاتها وبعد الفرز استحق النشر من الحلول التي اكتملت فيها كل الشروط المطلوبة ما يلي:
تحكم ظروف الوقت ونصدونغيب
ونعود لتراث الجزيرة بساعات
«بالفاكس» نرسل للجزيرة مكاتيب
صداقةٍ دامت سنين طويلات
مشاري خالد الدعجاني
شقراء
***
تحية مني لهندي وترحيب
لنا مع الألغاز صوله وجولات
أحدٍ يجيب الحل في قوله امصيب
لا قال ذاك الفاكس يرسل جوابات
علي رشيد الرشيد - رياض الخبراء
***
يامرحبا والطيب في منقع الطيب
والطيب لأهل الطيب سلم وعادات
تنشد يابن نابت وتلقى من يجيب
بالفاكس نرسل لك حلول وإجابات
سالم عبدالله العرجاني
الأفلاج الفريشة
***
ما فيه حي يعلم السر والغيب
غير الذي عرشه تعلا السماوات
وكل البنادق تخطى الرمي وتصيب
و«الفكس» قام بواجبه بالغياثات
الأيمن الزلفي
***
حييت يابن غياث بأحلى التراحيب
أرسلت لك ب«الفكس» مني تحيات
الرجل «فكسٍ» دون شك ولا ريب
ذي رمعتي.. وأقول للناس رمعات
سعد صنهات السهلي
الدرعية
***
يا أهل الوفاوالمرجلة والمواجيب
ياللي تجيبون المعاني جزيلات
ثلثين سر المعرفة بالتجاريب
و«الفكس» له باللغز رمز وعلامات
محمد عبدالكريم الغزي
الزلفي
***
يا مرحبا مني سلام وترحيب
مني لكم مقرونة بالتحيات
الفاكس ما غيره ترى يا هل الطيب
يا خذ ويعطي من علوم سريعات
محمد بن عبدالعزيز الخنيفر
أشيقر
***
يا مرحبا يا كاتب اللغز ترحيب
ولمحررين الصفحة ازكى تحيات
اللغز حله ما بها شك أوريب
الفاكس اله في بعض الأحيان فزعات
جهاد العقيلي
***
يا الشاعر اللي رتب اللغز ترتيب
لغزك حكمته دون زلة وغلطات
لغزك تراه الفاكس الغى المناديب
ياصل سريع وقايم بالمهمات
سعود معجب آل ظافر
الرياض
***
يا هندي أبرسل سلامي وترحيب
برسل سلامي لك ووافي التحيات
بالفاكس برسل لك بليا مناديب
لا من عطى «أوكي» تبين اشارات
معجب مطلق الشكرة
الأفلاج
***
أهلاً بهندي مع كثير التراحيب
الشاعر اللي صاغ لغزه بالأبيات
الحل : فاكس ما به شكٍ ولا ريب
اتقنت وصفه يا صبي الغياثات
مشواح ثامر الشمري
الرياض
***
هندي يا هندي جاك حلي بترتيب
يم الجزيرة يا عسى الوقت ما فات
هذا جهاز الفكس وبحلي امصيب
يقضي لزوم اللي بعيد المسافات
سعد مويزر البدراني
الرس
***
يا مرحبا يا مرحبا باللواعيب
عداد ما قالوا على اللغز رمعات
الحل واضح ما يبي اليوم تقريب
الفكس عجلٍ للحلول السريعات
نفلاء بنت عبدالله بن مشاري
بريدة
***
أنا بحل اللغز عندي تجاريب
لا سهل الله لي تهون الصعيبات
الفاكس وقت اليوم مثل المناديب
إن كان ما جاء له مع الدرب عثرات
سعود بن جازي الحربي
الرياض
***
على أهل الأفلاج كسابة الطيب
من وادي الخرمة سلام وتحيات
واللغز حله يا رجال المواجيب
«الفاكس»وأوراقه ولا فيه شكات
شبيب بن هذال السبيعي
الخرمة
***
يا مرحباً بهندي ملايين ترحيب
أقولها من جد ما هي مضاهات
اللغز بين يا حصان الأطاليب
لغزك تراه الفاكس ما به مراوات
فهيد عبدالله أبا الخيل
دخنة
***
هندي سلام الله عليكم بترحيب
من ساس قومٍ كاسبين الجمالات
وعبر الجزيرة نرسل الحل ونجيب
وبالفاكس أرسل لك سلام وتحيات
كريم عيسى العنزي
الخرج
***
للصفحة الغراء تحية وترحيب
وللمرسل اللي ينتظر حل الاثبات
الفاكس حله يا كرام الأشانيب
في لحظةٍ ياصل بعيد المسافات
جلعود بن لافي الشمري
حائل
***
الله يعافي مكملين المواجيب
اللي لهم في ساحة العرف وقفات
الفاكس ما يلحقه شكه ولا ريب
يرسل لنا المرسال في كل الأوقات
عبدالهادي فهاد العرجاني
الأفلاج
***
بسم الذي يعلم عن السر والغيب
الخالق اللِّي نزل الحق بآيات
يا فكس أنت الحل ما ظِن به ريب
لا هنت وصِّل حلنا للغياثات
فهد بن عقيل الطويان
بريدة