مثل الجواهر

حزّت بصدري وانا ماني بهارجها
لو كل كلمة اليا جتنا طردناها
بعنا الثمينه بسعر ما يخارجها
لو مرّت السمع ما كنا سمعناها
ونقفل الرأس عنها لا يبرمجها
ومن يم هذا لهذا ما نقلناها
والناس واجد وتلقى من يروجها
من جابها بين خلق الله وودّاها
لو به مراجل ترى نفسه يسمجها
من عامل الناس في سابق خطاياها
يقعد بدار خلا ما داج دايجها
في كنة تشوي الجربوع رمضاها
تابس غصون الشجر من حر واهجها
والناس بالحق حكم الشيخ ما ارضاها
ما ترضي الناس لو أنك تحججها
ياللي تبي الطيبة خذها وعطناها
وخل الطريفة طرية لا تثلجها
واقضب طريق الأوادم وامش ممشاها
اتبع دروب العرب وادرج مدارجها
وارسم لنفسك حدودا لا تعداها
من حط نفسه بدرب الضيق يحرجها
وان كان نفسك هواها قام ينحاها
حط الأعنة بروس الخيل واسرجها
وفكر بمنكافها قدام مغزاها
واضرب حساباتها وتشوف ناتجها
وكل بعضده يموح الدلو برشاها
وتلقى كبود الظوامي من يبرهجها
وان كان توك على صدرك تهجاها
حنا ترانا اندرس في مناهجها
من يم مصباحها نبعد معشاها
اليا قعد راعي الضلع يدرجها
لو هي صعيبة اليا انعاجت عدلناها
واللي تجي مستقيمة ما نعروجها
نهتم في وزنها وابرام معناها
ومن الكرستال واللؤلؤ نتوجها
مثل الجواهر اليا منا نضمناها
وسلوكها من جديد الزري ننسجها
مخايل ترتدم والصدر منشاها
أن دك بالبال داكوك يهيجها
واليا أمطرت ضاقت الوديان في ماها
تأخذ اليا لحول ما يبسة مدالجها
ان صدّت الناس عنا ما اعترضناها
ما تقفي الناس عنا وانتولجها
وإن جاتنا الطيبة بالطيب زدناها
الطيبة بالعسل والسمن نمزجها
وإن جاتنا الثانية نصبر ونرفاها
يمكن اليا فاق راعيها يعالجها
وان عادها عودةٍ ما عاد ينساها
من حربة في صميم الصدر نولجها
مسمومة يبلش الدكتور بدواها
ما يقنع الخبل لين أنه يلامجها
عبدالله زويبن الحربي